SHILLONG, Nailar 31: Ka kynhun ki nongïalehkai ïakop siat suloi jong ka Shooting Association of Meghalaya (SAM) ka la khur haduh 37 tylli ki takma ban pyndep ha ka kyrdan ba ar ha ka rynsan ïakop jong ka 13th North East Zone Shooting Championship, 2026 ha Guwahati.
ïa kane ka championship la pynlong hynriew sngi lynter naduh ka 25 haduh ka 30 tarik Nailar, 2026 ha Kahilipara Sports Shooting Range, 4th APBn Complex, Guwahati.
Kine ki 37 tylli ki takma ba ka jylla ka la ïoh ban khur ki kynthup ïa 13 tylli ki takma ksiar, 14 tylli ki takma rupa, bad 10 tylli ki takma rnong. Da kane ka jingïalehkai kaba kyrpang ka pynlong ïa ka jylla sa shi sien kum kawei na kiba seisoh tam jong ka thaiñ ha kane ka jingïalehkai, da kaba wan hadien tang ïa ka jylla Assam.
Haba phaidien, ka jylla ka la ïoh ba kan khur 61 tylli ki takma (24 tylli ki ksiar, 22 tylli ki rupa, bad 15 tylli ki rnong) ban pyndep ha ka kyrdan ba ar ha ka sienjam kaba 12 jong kane ka lympung. Bad kane ka pynshisha ba ka jingkiew jong ka Meghalaya ha ki rynsan ïakop siat kam dei kaba jia tang shisien.
Nalor ka Assam bad Meghalaya kiwei pat ki kynhun ba ïashim bynta mynta u snem ki kynthup ïa ka Manipur, Mizoram, Nagaland, Assam Rifle Marksmanship Unit, the Army, bad ka Sikkim.
Halor kane ka jingjop, na ka liang jong ka SAM ka ai khublei sha uwei pa uwei u nongïalehkai, ki coach, bad ki dkhot nongtrei kiba la kyrshan ban pynlong ïa kane ka jingïashim bynta kaba seisoh.
“Ka jinglong shlur, ka jingpynleit jingmut, bad ka jingïakhun khlem sangeh jong ki ka la pynsah ïa ka Meghalaya ha ka kyrdan ba ha khlieh duh jong ka thaiñ ha ka ïakop siat, bad ka synjuk kam lah ban khlem da sngew sarong ïa kaei kaba kane ka kynhun ka la tei,” la pynpaw ka SAM ha ka kyrwoh.
Kumba ka paw, ka SAM ka dang don ka jingangnud ban nang pynkhlaiñ shuh shuh ïa ki jingtei na ka bynta kane ka jingïalehkai siat suloi bad ki lad ai jinghikai ha kylleng ka jylla Meghalaya, bad ka khmih lynti ban wanrah ïa ka jingïalehkai kaba kham bha shuh shuh ha ka lympung bah jong ka 39th National Games 2027 ka ban sa wan.
