Shillong, Nailar 31: Ka Nangkiew Irat ka la khur ïa ka jingjop kaba ar sien lynter da 1-0 pyrshah ïa ka Mylliem ha ka Shillong Premier League 2026 ha madan First Ground-SSA Stadium, hynne ka sngi Nyngkong.
U Ronaldkydon Lyngdoh Nonglait u la thep ïa ka namtam jong kane ka jingïakhun ha ka minit kaba 39 jong ka kylla step.
Da kane ka jingjop ka Nangkiew Irat mynta ka la kamai 7 point bad ka shong ha ka thup kyrdan Top 4, katba ka Mylliem ka dang ïaineh sha trai duh jong kane ka lympung kaba don 10 tylli ki kynhun hadien saw tylli ki namrem.
Ka Nangkiew Irat ka la ïoh shibun ki lad ban thep kham bun ki kol khamtam ha ka kylla step, hynrei ka la pynsepei ïa ki kabu ba ka la ïoh.
Ha ka jingïakhun, ka Nangkiew Irat ka la ïoh ban lamkhmat tang hadien katto katne por ba u Edyvenson Dhar u la pynbiang ïa ka bol pashat sha u Ronald uba la thep da kaba suk ïa ka bol sha kol.
Ka jingïalehkai ha ka kylla miet kam da don kyntien than ban batai, wat hadien ba la mih paw ki kato katne ki jingpyrshang thep kol, kum na u Jefferson Pakyntein uba la shut jam bha ïa ka bol ha ka minit ba 68 na bynta ka Nangkiew, hynrei ka bol suit ka la her beit shalor, katba na ka liang u Alem Khongwir um shim la lah ban pynïakynduh ïalade bad ka bol ba la ïarap ban pashat sha u da u Remark Kharmalki.
Ha kane ka sngi Ba-ar kan dei ka jingïakhun kaba la ap khmihlynti bha hapdeng ka Meghalaya Police pyrshah ïa ka Shillong Lajong ha ka por 3:40 nohphai sngi.
Baroh arliang ki kamai 7 poiñ na ki lai tylli ki jingïakhun da kaba jop arsien bad ïakhaid shisien, bad la khmih lynti ba kine ki ar kynhun kin pyrshang ban ïakhun tyngeh naka bynta ban wanphai bad ka lai point na ka madan ïakhun.
