Ban pynkut ïa ka kynrum kynram NEHU Wanrah noh da uwei u VC, kyrpad ka jylla ïa ka sorkar pdeng

Shillong, Nohprah 17 : Ka Sorkar Jylla ka la dawa na ka Sorkar Pdeng ban bujli noh ïa u Vice Chancellor ka Skulbah North Eastern Hill University (NEHU) hadien ba kane ka jingdawa ka la neh la palat shisnem tam kumba la pynsngew da kiba bun balang kiba don bynta ha NEHU.
Na ka liang u Myntri ka tnad Pule Puthi ka sorkar jylla, Bah Lahkmen Rymbui haba kren bad ki lad pathai khubor u la pynpaw ïa ka jinglyngoh ba wat hadien shisnem ba mih ka jingdawa ban bujli noh ïa u VC hynrei haduh mynta ka sorkar pdeng kam patiaw ei ei.
“Lada dei ba tang kawei ka kynhun ka dawa lehse ïa kata lah ban sngewthuh hynrei hangne pat baroh kiba don bynta bad ka skulbah NEHU la ka long naduh ki nonghikai, ki nongtrei bad kumjuh ki samla pule ki la mih ban pyrshah lut bad pynlong ruh ïa u Pro Vice Chancellor ban iehnoh kam,” ong u Myntri.
Kumta halor kane, u la ïathuh ba ka sorkar jylla ka la thoh sha ka tnad pule puthi jong ka sorkar pdeng ban tuklar noh mardor ïa kane khnang ban pynkut noh ïa ka kynrum kynram ha katei ka skulbah kaba dei ban long ka shlem ai jinghikai kaba paka tam ha ka thain.
Ha kajuh ka por pat u la ïathuh ruh ba ka sorkar jylla ka la kyrpad ïa ka sorkar pdeng ba kan kylla biang ïa ki kyndon jong ka National Council for Teacher Education Act khnang ba ka Sorkar Jylla kan lah ban ïarap pyllait ïa kiba bun ki nonghikai na ka Teachers Elegibility Test (TET) khamtam eh ïa kiba la trei hashwa ban pyntreikam ïa ka Right to Education (RTE).
Kumta, halor kane, u Myntri u la ong ba ka long kaba eh ban pynkylla ïa kane ka rai jong ka Supreme Court. Kumta, na ka liang ka Sorkar hapoh ka jingkhmih u Myntri Rangbah ka la thoh sha u Myntri ka tnat Pule Puthi ka Sorkar India, ba un sngewbha ban pynkylla ïa ka NCTE Act ban ïarap ïa ki nonghikai kiba la don ha ka kam shwa ban pyntreikam ïa RTE.
Shuh shuh u la ong ruh ba ka sorkar jylla ka la ïakren ruh bad kiwei ki Sorkar Jylla ban buh kajuh ka jingkyrpad sha ka Sorkar India khnang ban lah pynbeit ïa ka jingeh na ka hukum jong ka Supreme Court.