Nongpoh, Nohprah 16 : Ka Nongpoh Town Shopping Complex kala phuh da ki jingshai bala pynitynnad ryngkat ka jingsdang ban plie ryntih ïaki dukan bad mynta ka sngi kala nang khring shuh shuh ïaki paidbah da ka jingsdang ïaka Christmas Shopping Carnival bala pynlong ka Nongpoh Town Shopping Complex ha ryngkat ka jingtreilang bad ka G&C Store bad ka Friends of Women’s World Banking.
Kane ka iew kan neh kumba 5 sngi kynter bala sdang naduh mynta ka sngi haduh ka 20 tarik bad la wan ruh ban plie paidbah ïaka da ka kong Rona Khymdeit MDC ka Nongpoh, haka jingdonlang u Abhilash Baranwal Deputy Commissioner ka Ri-Bhoi, ka kong B Rani ADC Ri-Bhoi, ka E Marak Assistant Commissioner bad kiwei kiwei.
Lyngba kane ka iew Christmas Shopping Carnival ka jingthmu ka long ban khring ïaki paidbah ban rung sha katei ka complex bad ban ai mynsiem ruh ïaki nongshong dukan ba kin plie thikna ïaki dukan man ka sngi.
