Ampati, Nohprah 15 : Ka Deputy Commissioner jong ka South West Garo Hills, ka Hema Nayak ka la plie paidbah ïa ka jingai dawai polio ïa ki khynnah haduh san snem ka rta ba la tip kum ka Pulse Polio Immunisation Campaign 2025 ha ka jingïalang kaba long ha Naragre L.P. School kaba hap ha Mellim PHC ha ha kane ka sngi Nyngkong.
Ha kane ka prokram la donlang naduh SDMHO, Dr. Lydia Marak bad District Immunisation Officer Dr. Noreen Sangma, nalor kiwei kiwei ki heh ka tnad ka koit ka khiah.
Haba kren ha kane ka jingïalang ka DC ka la kyntu ïa ki kmie ki kpa bad ki nongri khunlung ba kin wan ïalam ïa ki khun jong ki sha ki jaka ai dawai polio khnang ban pyntikna ba kin ïoh ar sienjaw ki dawai oral pollio, da kaba pynshai ba kine ki dawai ki dei kiba kordor bha ban ïada ïa ki khunlung khynnah na ka jingpang polio nalor ba ka ïada ïa ka jingim.
Haba pyntip ba ka jingpynshai halor ka jingai dawai ka dei ban pynsngewthuh ïa ki paidbah ban pynthikna ïa ka jingïada kaba pura bad ban pynskhem ba ka jylla kan lait na kane ka jingpang, ka DC ka la kyntu ïa ki Village Health Councils, Nokma, bad ki Village Education Committees (VECs) ba kin snohkti lang bad ïa syllok bad kito kiba kyntait ïa kitei ki dawai khnang ba baroh ki khynnah kin ïoh lut ïa ki dawai ïada.
