Bat ki Pulit ïa u MLA Rajabala ha ka jingtalasi kali, ïaroh u Myntri Sorkar ïa ki Pulit ka Ri Bhoi

Nongpoh, Nohprah 11: Ban dang tehlakam ïa ki Kali ba pynkheiñ aiñ na ka bynta ka jingshngaiñ ki paidbah ha ka leit ka wan lyngba ka surokbah ha Ri Bhoi, ka tnad Pulit na Ri Bhoi ha ka jingïalam u Senior Superintendent of Police u V.S Rathore ki la bteng ban talasi ïa ki Kali kiba pynkheiñ aiñ da kaba pynlong ia ka jingtalasi Kali ha Byrnihat bad ha kane ka jingtalasi ïa ki Kali la la ioh bat shibun ki Kali ba pynkheiñ naduh kiba tah ïit ïong, kiba dih buaid, kiba ym deng seat belt bad kiwei kiwei kiba ki pynkheiñ aiñ.
Ha kane ka jingtalasi ki la bat ruh wat ïa ki Kali ki Pulit Assam bad ki Kali ba tah ïa u Sticker Army, halor ka jingpynkheiñ ain da kaba buh ïa ki Fog Light bad tah ïa ka sticker Army ha kaba ki Pulit ki la dain kuna ïa ki. Ha kane ka jingtalasi ym tang ba ki la bat naphang ïa ki Kali paidbah bad ha kane ka jingtalasi ki la ioh bat ruh ïa ka Kali u MLA ka liang pyrshah uba dei na ka party AITC bad u MLA ka Rajabala u Mizanur rahman Kazi, uba la mih shabar bad ai ka jingïaroh ïa ki Pulit ka Ri Bhoi kiba la trei shitom ban tehlakam ïa ki Kali ba pynkheiñ aiñ..
Kaba la dang ai mynsiem shuh shuh ïa ki Pulit ka Ri Bhoi ban bteng ïa kane ka kam ban talasi ïa ki kali ba pynkheiñ aiñ, ka dei ka jingwan poi u Myntri sorkar ba peit ïa ka tnad C&RD bad u MLA ka Jirang u Bah Sosthens Sohtun, uba la mih na ka Kali ban ai mynsiem ïa ki Pulit ka Ri Bhoi halor kane ka kam kaba bha tam na ka bynta ka jingshngaiñ ki paidbah ha ka leit ka wan lyngba kane ka surokbah National Highway ha Ri Bhoi District.
Haba ai jingkren sha ki lad pathai khubor, u Bah Sosthnes Sohtun u la pynpaw ïa ka mynsiem jong ka jingkmen ba ka tnad Pulit na Ri Bhoi ha ka jingïalam u SSP ki la dang bteng ban pyrkhing ïa ki Kali ba pynkheiñ aiñ bad kane ka long shi bynta ban ïada ïa ki mynsiem ba kordor ban lait na kino kiino ki jingjia ba sngewsih kaba dei tang na ka daw ka jingpynkheiñ aiñ ki Dribar kiba ñiah ïa ki Kali.