Rai ka EC ka VPP ban ym shah die kyiad ne ki karkhana shna kyiad hapoh u pud u sam ka KHADC

Shillong, Nohprah 10 : Ka Executive Committee ba la ïalam da ka Voice of the People Party (VPP) hapoh ka Khasi Hills Autonomous District Council (KHADC) ka la rai ban khnang die kyiad phareng ne plie ïa ki wine store, ki bonded warehouse ne ki karkhana shna ki jingdih ba pynbuaid hapoh u pud u sam jong ka KHADC.
ïa kane ka rai la shim da ka EC ha ka jingïalang jongka ha ka 19 tarik Naiwieng bad ka jingthmu ka long ban khanglad ïa ka jingjyllei ki dukan kyiad kaba la ktah jur ïa ki long ïing ha ka imlang ka sah jong ki Khasi.
Ka EC ka la bthah ïa baroh ki Rangbah Shnong, ki Sordar Shnong, Matabor, ki Myntri Shnong ba kim dei shuh ban ai ïa ki No Objection Certificate (NOC) ne kano kano ka jingmynjur ban plie ïa kine ki dukan kyiad lait noh lada ïoh ka jingmynjur da ka Dorbar Shnong baroh kawei.
Kane ka jingkhang ban die ïa ki jingdih pynbuaid ka long ruh ha kiwei kiwei ki dukan bad la khang pyrshah ruh ban lum thup ïa ki jingdih ha ki bonded. Kane ka hukum kan treikam mardor tad haduh ban pynbna da kumwei pat.
“ Lait noh tang lada ïoh ka jingmynjur da ka Dorbar Shnong ïa ka NOC ne kano kano ka jingmynjur lah ban ai ban seng ïa ki wine store, ki bonded ne ki karkhana shna kyiad” ong ka hukum ba la pynmih da u EM ba dei peit ïa ka Elaka Administration u bah Denxil Raynard Chen.
Ka EC ka kyntu ïa baroh ki Dorbar Shnong ba kin ïatrei lang halor kane ka kam.