Byrngem ka JNC ban ujor sha ïingbishar lada pynlong jubor ïa ka public hearing ha Daistong EJHD

Khliehriat nohprah 10: Ha ka jingiakhih ba la pynlong da ka Jaiñtia National Council (JNC) mynta ka sngi hakhmat ka ophis u Deputy Commissioner ha Khliehriat la wan ban ïa snohkti lang da ki nongshong shnong kiba na Daistong bad na ki shnong ba don ha elaka Nongkhlieh, u nongialam ka JNC u la byrngem ba un iaid shakhmat ban ujor wat shaduh ka ïingbishar Meghalaya High Court lada ka sorkar kam sngap ïa ka sur ki paidbah bad ka jingdawa ka seng ban pynsangeh shi syndon ïa ka jingthmu ban pynlong ïa ka public hearing na ka bynta ka company Shree Cement Ltd ha shnong Daistong.
Ha kane ka jingiakhih shong kyllaiñ myngngor ki nongialam bad ki dkhot jong ka JNC bad kumjuh ruh ki nongshong shnong na Daistong ki la rah da ki pla card kiba don ki jingthoh bapher bapher kiba kren jingpyrshah ïa ka jingthmu ban shna karkhana dewbilat ha Daistong .
Haba kren sha ki pathai khubor u President jong ka Jaiñtia National Council, u bah Sambormi Lyngdoh u la ong “Lada ka sorkar kam sngap ïa kane ka jingiakhih ba jai jai bad lada ka pynlong jubor ïa ka public hearing ngi na ka liang ka seng ngin leit ujor shaduh Meghalaya High Court namar ym dei tangba ki pynkheiñ ïa ka aiñ jong ka Meghalaya Land Transfer Act ki pynkheiñ ruh wat ïa ki aiñ jong ka Sixth Schedule, namar ka Sixth Schedule ka khanglad ïa uno uno u bar jylla ban thied jaka” ong u nongialam ka JNC.
Ha kaba iadei pat ka jingiadie iathied jaka ha shnong Daistong tei u nongialam ka JNC u la ong “Ngi na ka liang ka seng haba peit bad bishar ïa ki kot ki sla jong ka M/s Shree Cement Ltd, ngi lap ba ha ka jingia die iathied ïa ka khyndew ka long kaba beaiñ namar ka jingia die ïa thied ka long tang hapdeng u Bharat Sharma uba mihkhmat na ka Shree Cement bad u Syrpaibha Sukhlaiñ uba kam ba u dei u trai jaka, ha ka jingiadie iathied jaka ym don pat kano kano ka jingsakhi da ki waheh shnong , lane u doloi lane ka district council, ha kajuh ka por ruh ha ka jingshisha haba don ka jingia die ïa thied dei ruh ban da ioh bor na ka sorkar jylla kaba long katkum ka Meghalaya Land Transfer Act, hynrei ngi iohi ba ïa kane ruh ki khlem bud ki la shu leh stad hi tang para ma ki, te kane ka jingleh jong ki ka long kaba beaiñ, te na ka liang ka JNC ngi la buh da ka jingthoh sha u Deputy Commissionr ka East Jaiñtia Hills District, kumjuh ruh sha ka Commissioner & Secretary Revenue bad ngi la pan jingpynshai ruh na ka Jaiñtia Hills Autonomous District Council ha kaba iadei bad kane ka bynta tangba haduh mynta ngim pat shym la ioh pdiang satia ïa kano kano ka jubab, ngi la dep wan jurip ruh ïa ka jaka ha Daistong kaba thmu ban shna ïa ka karkhana dewbilat ngi lap ba ka dei ka jaka kaba don sawdong da ki lyngkha rep jong ki nongshong shnong, te lada ailad ïa ka Company ban iaid shakhmat kan sa ktah ïa ki nongrep.
Ngi dawa ba dei ban pynsangeh mardor ïa ka public hearing ha shnong Daistong, kawei ka khubor kaba shai ngi phah sha ka sorkar ka long ba lada jia kano kano ka jingjia kaba sngewsih ïa ki briew kiba pyrshah, ka sorkar, ka tnat pulit ki dei ban shim ïa ka jingkitkhlieh, nalor ba ki dei kiba la pynkheiñ ïa ka aiñ, ki la maham ruh ïa kiba pyrshah bad lada ka sorkar ka dang shah ban pynlong public hearing kane ka dei shisha kata ka sorkar kaba ailad ïa ki kam beaiñ, lada ka sorkar ka pynlong jubor ïa ka public hearing ngi ruh ngin leh da ka bor ban pynsangeh”
Na ka liang ka seng ka la pynpaw ruh ka jingsngewkhia da kaba ong ba ka jingwan ki karkhana ka ktah ruh ïa ka mariang, naduh ki um ki wah, ki khlaw ki btap bad ka lyer ba ring mynsiem bad ong ruh ba na ka liang ka seng kan iai don lang bad ki nongshong shnong kiba dei ki nongrep kiba ieng pyrshah ïa ka jingthmu ban shna karkhana ka Shree Cement Ltd bad lada ka sorkar ka pyni bor da kaba pynlong jubor ïa ka public hearing ka seng ruh ka long kaba la khreh ban ïa pyni bor.
Uwei na ki nongshong shnong na Daistong, uba la wan ban ïa don lang ha kane ka jingiakhih ka JNC. U la ong “ Lada shna ïa kane ka karkhana Shree Cement ha dong Kharasiang Lumpyrshin ka dei ka jaka ka bym pat jngai na jaka ba sah briew bad ruh sawdong ka jaka ba thmu ban shna karkhana ki don ki pynthor rep kiba ki rep bad ju im ja kpoh na kine ki pynthor ba la buh da ki longshwa, te lada wan kane ka karkhana kine ki jaka rep kin duh kin dam bad baroh hi ki tip ba u khaw na ka thaiñ Nongkhieh u dei u khaw uba bang bha bad u jhur ruh ba ngi rep u long bha”
Shuh shuh utei u rangbah na Daistong u pynpaw da ka jingsngew khia bad ong ba lada wan seng karkhana kan wanrah ruh ka jingjot ïa ki khun samla ka shnong bad kin wan ruh bun jait ki jingsniew kum ki drok, ka kyiad bad kiwei kiwei ki jingsniew bad kaba ma ba ioh hadien habud ka bha ka miat kan jah noh bad kaba ma ba ioh jah ioh dam noh wat ka jingim jinglong kristan ha shnong Daistong.
“Katkum ka jingtip ba ngi ioh ki la ong ba lada shna ïa kane ka karkhana ha shnong kin don bun bah ki briew kiba na bar jylla ki ban wan bad kin don haduh khatar- khatlai hajar ngut kiban trei ha karkhana, katba ngi tang hapoh ka elaka Nongkhlieh ngi don tang hapoh shiphew hajar ngut, kumta ngim tip shuh, ngi sngewthuh ba ki jingsniew, jingthala kin long ki bym lah shuh ban batai, te na kata ka daw ngi kyrpad ïa ka seng ban lam lynti lem ïa ngi kum ka shnong Daistiong. Shuh shuh ngi don ruh sa kawei ka kynhun ki nongrep, ka Synjuk ki nongrep kaba ieng pyrshah ïa ka company bad kane ka synjuk ka la ujor ruh ïa ka jingleh donbor u Waheh Shnong uba la ai NOC khlem ka jingtip ka Dorbar Shnong”
Kiba la ai jingkren ki kynthup ruh u General Secretary JNC, u bah Wanshwa Suting, u Vice Prisident Nangjan Dkhar bad ki nongshong shnong kiba na Daistong.