Nongpoh, Nohprah 04: U Bah Sosthenes Sohtun Myntri ka tnad C&RD ka sorkar jylla haka jingdonlang ki ophisar naduh u SC Sadhu, Director Community & Rural Development, u A. Baranwal, DC, Ri Bhoi lem bad ki ophisar naka District Child Protection Unit, Ri-Bhoi District kila kynduh bad 2 ngut ki heprit kiba la duh noh ïala ki kmie ki kpa haka khlam Covid-19.
Ha kane ka sngi naka liang u Myntri u la ioh ruh ban ïakren markhmat bad ka samla Baphindaburom Shylla bad u samla Humbert Sohphoh kiba la duh noh ïala ka kmie bad u kpa haka por ka jingwan lyngshop ka khlam Covid-19 ban kylli ïaka jinglong jingman jong ki kaba mynta naduh ka pule ka puthi, ka koit ka khiah bad baroh ka jingdonkam jong ki haka jingim, kumno ki ioh ka jingkyrshan ha iing, ki para bad ka jingeh kaba ki ïakynduh naduh ka jingkhlad noh ki kmie ki kpa haka khlam Covid.
Naka liang u Myntri bad ki ophisar kila pynthikna ruh ba ka sorkar kan ai ka jingkyrshan ïa ki bad ki la pynshlur ïa ki ba kin leit mih sha ki bor ba dei peit ha kano kano ka por ba ki donkam jingïarap na ka bynta jingdonkam bad ka bit ka biang jong ki bad ki dei ban ioh lyngba ka PM Cares.
Shuh shuh kitei ki 2 ngut ki phla ruh hakhmat u myntri bad ki ophisar ïaka jingshem jingeh kaba ki kynduh haka jingim naduh ba kila duh noh ïala ki kmie ki kpa bad naka liang ka sorkar ka pynthikan ban ai ka jingïarap sha kitei ki khynnah ryngkat ka jingpynshlur ruh ba kin buh ka thong haka jingim jong ki ryngkat ka jingbtin lynti naka bor district ha kaba ïadei bad ki jingdonkam jong ki.
