Mawkyrwat, Nohprah 03 : U bah Kitborsing Lyngdoh uba dei u President jong ka Seng Samla Shnong Mawkyrwat u la ïathuh ba hadien ka jingleit khynra ïa ki nongdie kyiad be-aiñ ha ïew Mawkyrwat u la shah byrngem da kaba u la shah phun ha ki nongdie namar tang na ka daw ba ki nongdie ki la shah knieh noh ïa ki mar jong ki.
Ïa kane ula ïathuh haba ai jingkren ha ka jingïalang kaba la long ha Madan Jakar kaba hapoh jong ka Shnong Mawkyrwat ha ryngkat ka jingdonlang u Bah B. Jyrwa, MPS, Superintendent jong ki Pulit ka South West Khasi Hills District, u Bah B.K. Jana, Additional Superintendent ka District, u Bah J.P. Lakiang, Officer In-charge ka Mawkyrwat Police Station, lem bad ki nongïalam shnong jong ki 12 tylli ki shnong.
Ym tangkata, u bah Kitborsing Lyngdoh ula pynpawruh ba ïa kita ki jingbyrngem um sheptieng namar ba ki trei ïa ka kam ba bha ha imlang ka sahlang bad ban pynbha ruh ïa ka longbriew manbriew jong ki longïing longsem ki khun ki kti baroh bad ula ong shuh shuh ba lada ka don ka jingshah kti jong ki longkmie ne ki longkpa, ki samla jong ka shnong ïa kiba kum kita kin nym ai lad hynrei kin ïaid beit ban wad ïa ki ha ryngkat ka jingïatreilang bad ki bor jong ka aiñ.
Ha ka jingkren jong u, u la ïathuh ruh kaba kham sngewsih ha kine ki sngi ka long ba ki khynnah samla kiba ju dih drok bad kiba la ju shah kem teng ruh ki la sdang jyllei biang bad ym tangkata, wat kiba la lait na ki jingshah sumar kiba kum kita ruh ki la sdang biang ban dih bad khaïi drok. Namarkata, u la buh ka jingkyrpad kaba jur hakhmat jong ki paidbah bad kumjuh ruh ïa ki bor jong ka aiñ ba kin ai ïa ka kti jong ka jingïatreilang khnang ban lah ban rad dyngkhong syndon ïa ki jingsniew hapoh ka South West Khasi Hills District.
Katba ha ka jingkren jong u bah B. Jyrwa, MPS, Superintendent jong ki Pulit ka South West Khasi Hills District u la pynpaw ka jingaikhublei na ka bynta ka shnong Mawkyrwat, ka VDP, ka Seng Samla bad ka Seng Longkmie Mawkyrwat lem bad kiwei de ki Shnong kiba la don ka jingïatreilang ban leit khynra haduh ba ki la kurup ïa ki bun tylli ki kyiad bad kane ka pynpaw shisha ïa ka jingïalong shitylli ban rad-dyngkhong ïa ki jingsniew.
Kumta, lyngba kane ula kular ba ka na ka liang ka tnad pulit kan ai ïa ka jingïatreilang bad ki nongïalam shnong bad kumjuh ruh ba kin ai ïa ki number phone jong kita ki byrngem khnang ba ki bor jong ka aiñ kin leh ïa kaba donkam. “Lada ki paidbah ki donkam ha kano kano ka por ne kin ai jingpyntip ïa ki briew ba leh ki kam sniew ki lah ban phun ha u 112”, ong u bah B. Jyrwa, MPS.
