Thmu tei Police Outpost ka Assam ka Lum Pynthor Lapangap ong ka JSM Lapangap Unit

Jowai, Nohprah 02 : Ka Jaiñtia Students’ Movement (JSM) Lapangap Unit mynta ka sngi 2 tarik u Nohprah kala leit ban kynduh ha ryngkat ka jingthoh ïa u Deputy Commissioner ka West Jaiñtia Hills District u Abhinav Kumar Singh, IAS ha ophis treikam jong u ha Jowai.
Kane ka jingleit kynduh DC ka seng ka long halor ka jingpyrshah jur ïa ka jingthmu jong ka sorkar Assam ban tei ïaka Police Outpost lyngba ka tnad pulit kaba la wan pynhap ïa ki maw-it ha katei ka jaka kaba don ha Lum Pynthor Lapangap.
Hadien ka jingïakynduh bad u DC naka liang u President ka JSM Lapangap Unit u samla Heyboyme Myrphet ula ong ïa kane ka jingujor ba thmu tei Outpost da ka Assam la ïoh jingtip na ki paidbah ka shnong kiba la sakhi lyngba ki Video ba ka Assam kala thmu ban tei ïa katei ka Outpost (permanent) hapoh ka jaka kaba danghap hapoh u pud u sam jong ka Meghalaya.
Shuh shuh ula ong kane ka jingleh jong ka sorkar Assam ka khlem da burom ïa ka jingïakut kaba dang ïaid shakhmat mynta hapdeng ka jingïapynbeit pud ki ar jylla kata Assam-Meghalaya bad kane ka jingleh ka Assam kala pynbitar ïa ka seng.
Na ka liang u DC ula kular ïa ki nongïalam ka seng ban ïakren noh bad ki bor sorkar bad ban pyndam noh shi syndon ïa katei ka jingthmu ban tei Outpost (permanent) bad ula kular ban phah pynkynriah ïa ki pulit Assam kiba shong basah ha Lum Pynthor Lapangap.
U samla Heyboyme Myrphet ula kren shai lada ka sorkar kam lah ban leh eiei na ka bynta ka shongsuk shongshngaiñ jong ki paidbah ka shnong Lapangap bad ban lait na ki jingïamih huri hurai ha ki sngi ban wan, na ka liang ka seng kam banse ban shim da kiwei pat ki lad ki lynti kiba kham tyngeh.