Nongpoh, Nohprah 01: Hadien ba hynnin ka janmiet jong ka sngi u Blei la don ka kynhun na Assam kaba wan tah da ka rong ïong ïa u maw jingthoh ka skhim MGNREGA ha ka Shnong Maikhuli ba hap ha Meghalaya, ka la mih ka jingïakynad kaba jur hapdeng ki briew na Assam bad na Meghalaya ba ki nongshong shnong ka Maikhuli ki la pyrshah jur halor katei ka jingleh donbor ki briew na Assam.
Kane ka jingïakynad ka la sdang naduh hynnin ka janmiet jong ka sngi u Blei bad ka la bteng ruh haduh mynta ka step jong ka sngi Nyngkong haduh ba ki Magistrate bad ki bor pulit ki la hap ban hiar sha katei ka jaka na ka bynta ban khanglad ïa kine ki jingïakynad kiba la ktah ïa ka shongsuk shongsain ki paidbah ha kitei ki shnong khappud ka Meghalaya bad ka Assam.
Kumba la ioh lum jingtip, ka daw kaba la mih kane ka jingïakynad ba ki paidbah nongshong shnong ka Maikhuli ki la bitar, ka dei hi tang na ka daw ka jingdon katto katne ngut ki briew na Assam kiba la wan tah da ka rong ïong ïa ki jingtoh jong ki skhim pynroi ha u maw jingthoh ka skhim MGNREGA ba la wan rah da ka sorkar Meghalaya ha ka Shnong Maikhuli.
Haba la ioh ban ïa kren bad u Deputy Commissioner ka Ri Bhoi, halor kane ka jingjia, u Abhilash Baranwal u la ong ba kine ki jingïakynad ki la mih ha katei ka shnong khappud, ka dei tang na ka daw ka jingdon ki briew na Assam kiba la wan ban tah da ka rong ïong ha u maw jingthoh ka skhim MGNREGA ha ka shnong Maikhuli bad na ka liang ki nongshong shnong ka Maikhuli ki la pyrshah jur haduh ba la mih ka jingïakynad kaba jur hapdeng ki paidbah na Maikhuli bad na Assam.
U la ong ruh tang mar ïa ioh jingtip halor katei ka jingjia, na ka liang ka bor synshar District ka la phah mardor ïa u Magistrate bad ki bor pulit ban tem ïa katei ka jingïakynad na ka bynta ban khanglad ban nym mih kino kino ki jingjia kiba lah ban ktah ïa ka shongsuk shongsain ki paidbah.
“Kino kino kino ki kynhun ne ki riew shimet kiba pyrshang ban pynmih ïa ki jingïaklumar ha kitei ki shnong khappud kin sa shah kem bad shah pyngngad ha ki kyndon aiñ bad la leh ïa kane na ka bynta ka shongsuk shongsain ki paidbah ha kitei ki shnong khappud” ong u Abhilash Baranwal.
U la bynrap ruh da kaba ong ba kum u khliehduh ka District u la dep ruh ban ïa kren bad u Deputy Commissioner ka Kamrup ban shim khia halor kane ka jingjia na ka bynta ban wan rah ïa ka shongsuk shongsain ki paidbah ha kitei ki shnong khappud bad na ka bynta ki kam ban ïa pynbeit ïa ki pud ki sam ka rai kan shong ha ka sorkar Meghalaya bad ka sorkar Asssam, u la ong.
Shuh shuh, u la ïathuh ruh dang shen la dep ruh ban thung ïa ka Peace Committee halor ki jingïakynad kiba la ju mih na ka por sha ka por ha kane ka shnong khappud bad lyngba katei ka Peace Committee kin ïa kren sani ban wan rah ïa ka shongsuk shongsain bad lada don pat kiba pynklumar ne pynmih ïa ki huri hura kin sa shah kem bad shah pyngngad beit katkum ki kyndon jong ka aiñ, u la bynrap.
