Nongpoh, Naiwieng, 30: Ka kynhun Namsha Nongtham Pastorate CE Union haka sngi Saitjaiñ ka la lah ban noh synñiang bad ai jingïarap sha kumba 14 tylli ki longiing ba duk kiba donkam shisha ka jingïarap da ki jaiñkup syaid bad ka pisa ban long kum ka jingkyrshan ïa ki.
Ïa katei ka jingïalang sam jingïarap sha ki longiing ba duk la pynlong ha phyllaw ka skul Kdohhati Ri Bhoi Presbyterian Synod Secondary School, ha kaba la wan ruh ban sakhi lang da u MLA ka Mawhati u Bah Charles Marngar u ba la don bynta ban ïa snoh kti ban synñiang ha kane ka kam ba bha, haka jingdonlang u Pastor H.L Marsing lem bad ki nongïalam bad ki dkhot jong ka C.E Union.
La pyntip ruh ba ïa kine ki lad jingïarap ba la sam sha kitei ki longiing ba duk la ïoh ban pynmih pisa na ka kynshew kaba la mih na kawei ka Gospel Concert kaba la pynlong ha u snem 2024 ha Mawhati.
Haba kren ha kane ka jingïalang na ka liang u Pastor H.L Marsing, u la ïathuh ba kane ka jingnoh synñiang kam dei tang ïa ki paid riewngeit ka Balang Presbyterian, hynrei la shim kyllum lang na kiwei ruh ki jait Balang Kristan ha ka thaiñ Mawhati, namar ka jingthmu jong ka C.E Union ban ai jingïarap sha ki longiing ba duk kiba dei ki paradoh parasnam khasi bad kane kadei ka sien kaba ar ba na ka liang ka C.E Union ka la lah ban ai jingïarap sha kiba duk kiba donkam ia ka jingïarap bad yn dang ïai bteng ruh ha ki snem ki ban wan.
Na ka liang u Bah Charles Marngar haba kren ha kane ka sngi kum u kongsan, u la ai ka jingïaroh ïa ka CE Union kaba la shim ïa ka sienjam ban kynmaw ban don ryngkat bad ki longiing baduk ba rangli bad kane shibynta ka dei ka kam jong u Blei bad kum u nongmihkhmat u la kular ruh ba na ka liang jong u kumba u la ju kyrshan ïa ka CE Union u la kular ban ïai don ryngkat ban dang kyrshan ïa ki kam ba bha haki por ban dang wan.
