Da ki tiar ban pynkhuid ïa ka umdih ai sngewbha ki samla pule ka Kristu Jayanti sha 2 tylli ki skul

Nongpoh, Naiwieng, 30: Ki samla pule jong ka Department of Social Work ka skulbah Kristu Jayanti (deemed to be University), Bengaluru ki la pynmih ïa ka project kaba la ai kyrteng Pragati- Pure Water, Bright Future ban ai jingkyrshan ïa ki skul kiba bym ïoh satia ka jingkyrshan ba pura na ka bynta ka jingdonkam jong ka skul, khamtam ka jingdonkam ba kongsan kum ka um kaba khuid.
Ka thong jong katei ka project ka long ban pynïoh ïa ka umbam umdih kaba khuid bad kaba shngaiñ haki skul kibym ïoh ka jingïarap bad kum ka jingsdang bad ka jingpyrshang ban pyntreikam ïa katei ka project, na ka liang ki samla pule katei ka skulbah ki la ai sngewbha ruh da ki kor pynkhuid um (Commercial water purifiers) lem bad ki projector sha 2 tylli ki jaka pule ba kynthup ïa ka Government Tamil Higher Secondary School bad Government Urdu Higher Primary School.
Ïa kane ka project la pynïaid bad pyntreikam pura da ki samla pule katei ka skulbah lyngba ka tnad Social Work bad ki nongpynïaid ïa kane ka project ki kynthup ïa ka samla Ibashisha Lakhmie, Badashisha Ranee, Akuminla Imchen, Abhishek Mathew Das, Soubia Syed, bad ka Priyanka Khongbantabam.
Lyngba kane ka project kitei ki samla ki don ruh ka jingangnud ban kyntiew ïa ki skul pule ban pynlong ïa ki jaka pule kiba koit ba khiah, kiba biang pura ka jingdonkam jong ki khynnah bad khamtam ban kyntiew ïa ka pule ka puthi haki liang baroh.