Pynkhuid shnong ka DS Nongpoh, aiti u MLA daka Work Order, ki lathi bad torch light
Ka khuid ka suba ka dei ban long ka riti ka dustur
Nongpoh, Naiweing 29 : Ban pynneh pynsah ïa ka jingkhuid jingsuba ha ka shnong bad ban hikai ruh ïa ki nongshong shnong ba kin long kiba don ka jingkitkhlieh halor ka kam leh khuid, ka Dorbar Shnong Nongpoh mynta ka sngi ka la pynlong ïa ka jingpynkhuid shnong kaba ju long shisien shi snem. Ha kane ka sngi, ki paidbah nongshong shnong ki la mih shakhmat da ki tiar ki tar jong ki ban ïa shim bynta ha ka jingpynkhuid ïa ki bynta bapher bapher jong ka shnong.
Ha kaba sdang jong ka jingïalang, la wan ban pynshit pynshngaiñ da u MLA ka Nongpoh Constituency, Bah Mayral Born Syiem kum u kongsan, bad ka MDC ka Nongpoh, Kong Rona Khymdeit, lem bad u Bah Mathew Makdoh, Nominated MDC, ki la ai ki kyntien ai mynsiem bad ki jingkren shaphang ka jingdonkam ba ka shnong kan long kaba khuid bad ba ryntih.
Haba kren ha kane ka sngi, u Bah Mayral Born Syiem u la pynpaw ka jingsngewnguh ïa ki nongïalam shnong jong ka Nongpoh kiba la bteng ban pynlong man la u snem ïa kane ka jingpynkhuid shnong, kaba dei ka riti ka dustur kaba la sdang naduh ki por u men ba rim.
Ha katei ka jingïalang, u Bah Mayral Born Syiem u la aiti ruh ïa ka work order sha ka Dorbar Shnong na ka bynta ki kam tei ha ka shnong. Shuh shuh, u la aiti ïa ki 10 tylli ki dieng lathi bad 10 tylli ki torch light ban ai jingkyrshan ïa ki volunteer jong ka VDP Nongpoh.
Kiwei pat kiba la ïa donlang ha katei ka sngi ki kynthup ïa u Bah Silvester Mynsong, Rangbah Shnong Nongpoh, Bah Anthony Suchiang, Secretary Shnong, Bah Plielad Tiewsoh, Asst. Rangbah Shnong, Bah Linus Lyngdoh, Sordar ka Raid Nongpoh, lem bad kiwei kiwei ki riew rangbah jong ka shnong.