Ïatylli ki nongrwai ba pawnam ban wanrah ïa ki sur tynrai bad ban rakhe ïa ka put ka tem

Shillong, Naiwieng 27: Ka Akashvani Shillong mynta ka sngi ka la rakhe ïa ki mawmer ha ka kolshor da ka jingrakhe ïa ka Sangeet Sammelan kaba 67 ha kane ka nongbah. Ki nongrwai tynrai bad nongrwai jingrwai pyrthei kiba pawnam na kylleng ka jylla Meghalaya ki la ïawan lang na ka bynta ka jingrwai.
La pynlong ha North Eastern Hill University (NEHU), kane ka prokram ka pyni ïa ka jingkut jingmut jong ka Akashvani ban pynneh pynsah bad kyntiew ïa ki ritidustur rwai ba riewspah jong ka ri. Ha kane ka janmiet la don ki jingpyni ïa ki jingrwai tynrai jong ka thaiñ. Katba ki nongrwai tynrai kiba dei ruh ki nongïoh khusnam Padma Shri, kong Silbi Passah, kong Khorsha Kordor Marbaniang bad ka Louvre Venus R. Marak ki la pynhun ïa ki nongpeitkai da ki sur ba ktah ïa ka mynsiem, ka kong Gwyneth A. Mawlong, Na Rympei bad ka Colors kiba la wanrah ïa ki jingrwai ba kyrpang jong ki.
Haba ai jingkren ha kane ka sngi, ka Dr. Lapynshai Syiem, Head of the Department of Cultural Studies and Creative Arts, NEHU, ka la ong, “Ka Sangeet Sammelan ka dei ka jinglehkmen ban pynkup burom ïa ki sap ki phong bad ki barikor jong ka thaiñ. Ka Akashvani Shillong hi ka la long ka nongprat lynti ha kaba kyntiew ïa ki sap ha ka thaiñ.” Da kaba khot ïa ka Akashvani kum ka rynsan na ka bynta ki nongrwai shimet, ka la bynrap, “Lyngba ka jingpynbna ba man ka sngi, ka la long ka tyllong jong ki jingrwai bapher bapher. Mynta ïa ka Akashvani Shillong la ñiew kum ka rynsan jong ka ri ryngkat ka jingdon jong ka ha ka ri baroh kawei. Ka la ai sur ïa ki briew ki bym don lad ban ïoh ïa ki lad pathai khubor ban pynpaw ïa ka jingstad jong ki. Namar kata, ka don ka bor ban pynduh ïa ka jinglong marwei. Ka Akashvani ka pynkupbor ïa ka imlang sahlang. Ka la lah ban pynskhem ïalade kum ka dustur kaba sngewtynnad kaba la wanrah ïa ka jingkylla kaba stet ha ka imlang sahlang jong ngi.”
U Cluster Head & Regional Channel Manager, Akashvani Shillong, Bah Hamarlin Diengdoh ha ka jingai jingkren jong u, u la ong, “Ka Akashvani Sangeet Sammelan ka la ïeng kum ka sakhi kaba sngew sarong ïa ka jingshimkhia jong ka Akashvani ban kyntiew ïa ka pateng jingrwai ba riewspah bad bapher jong ka ri India. Haduh palat hyñniew phew snem, kane ka jingïalang kaba long man la u snem ka la pynïasoh lang ïa ki nongput nongtem ba tbit tam jong ka jingrwai Hindustani bad Carnatic Classical, ki dustur tynrai, bad ha kine ki snem ba la dep, ki jait jingrwai ba mynta bad ki jingrwai pyrthei, da kaba rakhe ïa ka mynsiem ba shirta jong ka rwai ka tem ha India.”
ïa ka bynta ba 67 jong ka Akashvani Sangeet Sammelan la wanrah da ka Prasar Bharati, ha ryngkat ka jingïatreilang bad ka Tnad Deiriti. Mynta u snem ïa kane ka jingïalang la pynlong ha kylleng ki 24 tylli ki centre ha kylleng ka ri. Ka don ar tylli ki concert ha kawei pa kawei ka jaka – kawei kaba la aiti kyrpang na ka bynta ka Indian Classical Music bad kawei pat na ka bynta ka Light/Folk Music. Ka Shillong bad Panaji ki la pynlong kyrpang ïa ki jingpyni ïa ki jingrwai pyrthei ba rim, kaba pyni ïa ka jingïar jong ki jingrwai na ki thaiñ jong ka ri India.
Ka Sammelan ka don ka bynta kaba kongsan ha kaba pynneh pynsah, kyntiew, bad pynpawnam ïa ka jinghiar pateng ki jingrwai ba riewspah jong ka ri India naduh ba la sdang ïa ka ha u snem 1954. Ka dang ïai bteng ban long ka rynsan kaba heh bha na ka bynta ki nongrwai ba pawnam bad kiba dang mih, kaba wanrah ïa ka jingithuh bad jingburom jong ka ri.