Katkum ka Act 2015 tang ki  shynrang kiba lah ban ïakhun Waheh Shnong, ong u MB Rymbai

Jowai, Naiwieng, 25: Katkum ka Jaiñtia Hills Autonomous District (Establishment of Elaka and Village Election Act 2015 Appointment, Power, Functions and Jurisdiction of Dolloi/Sirdar and Waheh Shnong) Atc 2015 ba la soi da u lat ka jylla, la thoh tang ki shynrang kiba lah ban ïakhun ïa ka kyrdan Waheh Shnong, ong u MDC ka Amwi Khliehtyrshi Bah Madonbai Rymbai uba long ruh u Chief Executive Member (CEM) barim ka Jaiñtia Hills Autonomous District Council (JHADC).
Kane ka jingbym shngewthuh ïa ki kyndon aiñ treikam ka dei ka jingdkoh ka rukom treikam jong ka Executive Committee (JHADC) ba mynta kaba khlem da buh shai ïa ka jingthoh ban maham ïa ki Dolloi ban ai jingbit, namar kane ka dang shu dep jia ha Sohmynting ha kaba la don ka kynthei kaba la mih shakhmat ban ïakhun ïa ka kam Waheh Shnong.
Halor kane ka jingjia, ula ong ka jingshah kynnoh nyngkong ka long ïa ka Executive Committee ka JHADC bad kum ka EC ka dei ban peit bniah ïa ki aiñ treikam, khnang ban nym shah ïalam bakla ki paidbah nongshong shnong ka thaiñ.
Ha kaba ïadei bad ka jingduh tulop ki nongtrei ka Council sa kawei u kynthoh ba ka dei na ka daw da ka jingshah ïalam bakla ki MLA ka Ri-Lum Jaiñtia kiba don haduh 7 ngut namar tang na ka bynta ka election jong ka GHADC ka Sorkar ka la pyllait ïa ka pisa kaba 100 klur tam sha Garo, ‘Hynrei ka long mo ïa ka JHADC ban pynsah teng ïa ka tulop kaba la buh jingeh mynta ïa ki kmie ki kpa ban siew ïa ka bai skul jong ki khun ki kti.
Kum ki nongshah jied ‘ngan ïasaid na ka bynta ki paidbah hapoh ka ïingdorbar bad nga kren da ka mynsiem ba ki nongshong shnong kim dei ban shah ïalam bakla’, pynkut u Bah Rymbai.