Nongpoh, Naiwieng, 25: Ka jingjur ki nongdih droks bad nongtuh haka thaiñ Killing bad kylleng ki shnong ba marjan ka la nang jur katba nang mih ki sngi, kaba la pynthud ruh ïa bun ki longiing namar ka jingjah jong ki tiar ki tar na ki iing ki sem hadien ba bun na ki samla kiba la ngop ha u drok ki shlur ban leh ïa ki kam sniew ba lai phew jait khamtam haka tuh ka thiem tang ban ïoh pisa ban thied droks.
Ha kaba kum kine ki jingjia la sakhi ruh ïa ka kam rung tuh ha iing briew haka step jong ka 23 tarik Naiwieng kaba dei ka sngi u Blei haka shnong Jorpul Killing ha Ri-Bhoi District, ha kaba uwei u samla kumba la sakhi ruh lyngba ka durkhih ba la ïohring lyngba ka CCTV, u la rung tuh khlem jingsalia ha kawei ka jaka sah ki samla pule bad rong ruh haduh 3 tylli ki tyndong shet jingshet kiba la buh ha phyllaw iing.
La ïoh jingtip ruh ki trai iing jong katei ka jaka sah ki samla pule ki ithuh ïa ka durkhmat jong u tei u samla u ba la rongtuh ïa kitei ki tyndong shet bad ïa ka jaka shong jaka sah jong u bad mar mar na ka liang ki trai iing ki la leit ban ujor da ka ejahar ha Khanapara Police Station pyrshah ïa utei u nongtuh bad na ka liang ki pulit haduh mynta ki dang pynlong ka jingtohkit bad ban thwet ïa utei u nongtuh.
