Ka jingsiew tulop ka sorkar ïaki ADC ka lah ban jia kumba long ka Reservation Policy

Jowai, Naiwieng 24: U ma Madonbai Rymbai MDC ka 4-Amwi Khliehtyrshi mynta ka lah sngi u Blei 24 tarik ula u pynpaw ka jingsngew bynnud halor ka jingbym ïoh lad jong u ban ïatai ïa ka ‘Motion’ kaba ula wanrah hapoh ka ïing Dorbar thawaiñ ka Jaiñtia Hills Autonomous District Council na ka daw ka jingbym ai lad u Chairman ka Council.
Na ka liang u ma Madonbai Rymbai ula ong kumno u Chairman wat haba la wanrah ïa ka motion ha miej ruh, hynrei um shem la ïoh lad satia ban ïatai ïa ka jingbha jingmiat jong ki District Council hapoh ka Jylla kaba kynthuh lang ïa ka JHADC.
‘Kane kala buh ha ka jingbynnud kaba khraw eh ïa u namar ka riti synshar jong ka Ri India ka dei ka Ri Synshar paidbah ‘na ka bynta u Paidbah ïa u Paidbah’ bad kane ka dei ka hok jong uno uno u nongshong shnong’ ong shuh shuh u ma Madonbai.
Ka jingpynduh lad ïa u ban ïatai ïa katei ka mat, ula kynnoh ba ka don kaei re kaei kaba sha lyndep wat ïa ki MDC ba la jied donburom da ki paidbah kim shem la ïoh lad ban kren na ka bynta ka jingmyntoi.
Shuh shuh kane ka jingmut jong u ma Madonbai Rymbai ban wanrah ïa ka Motion ka long kyrpang halor ka jingthmu jong ka sorkar jylla lyngba ka jingpynbna u Myntri Rangbah u Conrad K Sangma ban siew tulop ïa ki nongtrei ka Council kynthup lang ïa ka Pension.
Ula ong ki nongtrei ka JHADC kila duh tulop la 9 bnai mynta kaba kynjoh sha ka 100 klut tam, hynrei na ka liang ka sorkar kala pyllait tang ïa ka bhah pisa kaba 100 klur tam naka bynta ka GHADC ban siew ïa ka tulop jong ki.
Kaba sngew sheptieng kum u MDC u ong ‘kane ka jingthmu ka sorkar ban siew tulop sha ki Council ka lah ban jia kum ha kito ki por ïoh ïa ka jylla 1972 kaba kynthup ïaki nongïalam ka Bri u Hynñiewtrep naduh u (L) Hopingstone Lyngdoh,(L) B.B Lyngdoh, (L) Edwinson Bareh kila soi ïaka jingïateh kular ban pyntrei kam ïaka ‘Reservation’.
Da kaba ong balei kane ka Reservation ka pynïoh kam 40 la 40 percent hapdeng u Garo bad Khasi Jaiñtia, haba ki Garo ki don tang 24 ki MLA katba ki Khasi Jaiñtia ki don 36 ki MLA kaba ïapher 12 ngut ki MLA, kane ka jingthmu siew tulop ka lah ban jia kumjuh, ong u ma Madonbai.
Shuh shuh u ong kane ka jingthmu jong ka sorkar ka long kum ka dak ban pynduh pyndam noh ïa ka bor jong ka Six Schedule ne (abolish) shi syndon ïa ka namar kum ki MDC kim ïohlad satia ban ïatai ïa kino kino ki mat ba donkam.