Mawkyrwat, Naiwieng, 18: Ka Kashari Special Judge (POCSO), South West Khasi Hills ka la rai pynrem da kaba hukum ban phah set phatok ïa ki arngut kiba la shah kynnoh ba ki dei kiba donkti ha ka kam leh be-jot ïa ki heprit hapoh ki shnong ha South West Khasi Hills District.
U kyrwoh ba la phah da u Superintendent of Police ka South West Khasi Hills District Bah B. Jyrwa u la pyntip ba ha ka 14 tarik, Rymphang,2021 u Bah Nemanbor Lyngdoh uba sah ha ka shnong Rangthong u la mudui da ka ejahar ban pyntip ba u Robarness Lyngdoh, uba la 25 snem ka rta na ka shnong Mawmerang, South West Khasi Hills District u la leh be-ijot ïa i para kynthei jong u.
Ki Pulit ki la register case ha Mawkyrwat Women Police Station hapoh ki Sections 3(a)/4/5(n)/6 jong ka POCSO Act, pule lang bad ka Section 506 jong ka IPC. Ha jingtohkit, ka WPSI M. M. Arengh, ka la pynngat kyndon ha ka 31 tarik, Lber, 2021.
Ha ka 14 tarik, Risaw, 2025, ka Kashari ka la rai pynrem ïa u Robarness Lyngdoh da kaba hukum ban set phatok lai snem hynriew bnai bad daiñ kuna ruh 10 hajar. Lada um lah ban siew ïa ka kuna, u nongshah rai pynrem un hap ban shong phatok sa ar taiew.
Ha kawei pat ka jingjia, u SP u la pyntip ba ha ka 29 tarik, Nohprah, , 2012 u Bah Joyningstar Lyngkhoi uba sah ha ka shnong Wahkaji, South West Khasi Hills District u la mudui da ka ejahar ban pyntip ba ha ka 27 tarik, Nohprah, 2012 ha ka por kumba 7:00 baje janmiet u Bah Welbester Langrin na kajuh ka shnong u la pyrshang ban leh be-ijot bad byrngem pynïap ruh ïa ka khun kynthei jong u.
Ki Pulit ki la register ïa ka case ha Mawkyrwat Police Station hapoh ka Section 376 IPC, pule lang bad ka Section 3(a)/4 POCSO Act.
U SI R.D. Shira uba la shimti ïa ka jingtohkit u la pynngat kyndon ha ka 18 tarik, Nailur, 2014.
Ha ka 17 tarik, Risaw 2025, ka Kashari Special Judge (POCSO), South West Khasi Hills ka la rai pynrem ïa u Welbester Langrin da kaba hukum ban set along hynniew snem bad daiñ kuna 20 hajar. Lada um lah ban siew ïa ka kuna un hap ban shong phatok sa shi bnai.
