Ïoh jingmyntoi 300 ngut ki samla pule na ka 1st Sniawbhalang Dhar Pathfinder Programme

Wahiajer, Naiwieng 15: Ïa ka prokram ai jinghikai ‘Tuition’ kaba khlem jingsiew sha ki samla pule SSLC ïa kaba la tip kum ka ‘1st Sniawbhalang Dhar Pathfinder Programme’, la pynkut ïaka hynnin ka sngi Thohdieng haka jingïalang bala pynlong ha Dorbar Hall jong ka Wahïajer West Jaiñtia Hills District.
Ha kane ka sngi la wan ban ïashim bynta da ki samla pule, ki nonghikai, ki kmie ki kpa bad ki nongïalam shnong. Ha kaba la don haduh 300 ngut ki samla pule na ki lai tylli ki Tuition Centre kata na Ummulong Centre, Wahiajer Centre bad na Moodop Centre kila la ïoh jingmyntoi ban pyndep hok ïa kane ka prokram.
Ïa ka jingïalang pynkup burom la pynïaid da u samla Damechwa Dhar uba long u President ka NPYF bad u Chairman jong ka Pathfinder Programme. Kum ka dak jong ka jingtrei shitom ki samla pule kiba la wan hakhmat eh ha kane ka prokram la jied ïa ki Top-3 na manla kawei kawei na kitei ki lai tylli ki centre.
Ha kane ka sngi na ka liang u Symbud Myntri Rangbah ka sorkar jylla u ma Sniawbhalang Dhar haba ai jingkren uba ai mynsiem ïa ki samla pule ba kin don ka mynsiem trei shitom bad kiba don ka nongrim ban jop ïa ki jingïaleh. Ula kyntu ïa ki samla ba kin long kiba sngewskhem, kiba don akor bad kiba don ïa ka thong ha ka jingim.
La sam sha kitei ki samla pule baroh da ki tiar examine ki ban ïakhun ïaka SSLC ka ban wan. Ha kane ka sngi la pynkup burom ïa baroh ki nonghikai kiba don bynta ha ka prokram Pathfinder kum ka dak ka jingsngewnguh ïa ka jingtrei shitom jong ki.
La ïoh ruh ka jingkren na u Trippleson Muksor, Headmaster ka Achiever’s Higher Secondary School bad u Reformi Lamare, Local MDC ka Nartiang Wahiajer, kiba la ai ka jingïaroh ïa kane ka jingthmu ba bha, na ka bynta ban kyntiew ïa ka pule ka puthi jong ki samla pule hapoh imlang sahlang.
Na ka liang ka NPYF kala kular kino kino ki samla pule na ki lai tylli ki Centre kiba ïoh ïa ka kyrdan haka Top-10 jong ki eksamin SSLC yn ai khusnam ïa ki da ka Laptop.