Khlem da pyndep shwa ïa ka ‘Kñia Pyrthat’ ym lah ban pynlong ïaka shah Behdeiñkhlam: Dolloi Elaka Jowai

Jowai, Naitung 04: Hashaw ban poi ka lehñiam Behdeiñkhlam u Dolloi ka Elaka Jowai mynta ka sngi ha ryngkat ki Saw Langdoh kila pyndep ïa ka lehñiam ‘Kñia Pyrthat’, katba ha ka por nohphai sngi kila shim bynta lang haka jingïabam ha Madan Kñia Pyrthat’ ha ryngkat ki khun ka Seiñ Raij.
Ïa kane ka lehñiam ‘Kñia Pyrthat’ la pyndep ha ka por mynstep ha lum Mookhai da u Sangot Paswet, u Sangot Pakynteiñ bad u Sangot Pasubon ha ka jingdonlang u Dolloi, u pPtor, u Langdoh bad ki Waheh Wasan.
U Dolloi ka Elaka Jowai ma Puramon Kynjing haba batia shaphang kane ka ‘Kñia Pyrthat’ ula ong ba ïa kane ka lehñiam la pyndep ryngkat bad ki Saw Langdoh kita u Langdoh Jowai, Langdoh Tuber, Langdoh Ïalong bad Langdoh Kongwasan Chyrmang kaba long katkum ka Riti ka Dustur bad ka ñiam ka rukom hashaw ban poi ki saw sngi lai miet jong ka lehñiam shad Behdeiñkhlam.
Ula ïathuh ba kane ka lehñiam Kñia Pyrthat ka long shi bynta ka jingïadei hapdeng ki Saw langdoh, ka jingïadei ha ka bor shynshar ka Elaka Jowai bad ka jingïadei ban ïoh ïa ka jingkyrkhu kyrdoh na u ‘Syiem Pyrthat’ uba long u nongsneng nongkhraw bad u nongpynbiang ïa ki kam ñiam kam rukom.
“Yn ym lah ban pynlong ïa ka shad Behdeiñkhlam hapoh ka Raij Jowai lada ym pat pyndep ïa ka Kñia Pyrthat”, ong u Dolloi namar baroh ki jinghikai kiba ïadei bad ka shad Behdeiñkhlam ki wan na ka jinghikai jong u Syiem Pyrthat.
Shuh shuh ula ong ba ka jingpyndep ïa ka Kñia Pyrthat mynta ka sngi kam long tang ka jingainguh hynrei kala long ka lehñiam ba pura ha kaba u Langdoh Jowai ula pynkhreh da u Sniang, u Langdoh Kongwasan Chyrmang u wanrah ïa ka sla, u Langdoh Tuber ula wanrah ïa ka Pyrnah Pyrjin bad u Langdoh Ialong ula wanrah ïa u khaw.
Ha kane ka lehñiam la don ruh ka jingïateh jutang hapdeng u Dolloi ka Elaka Jowai bad ki Saw Lyngdoh ba la mihkhmat da u Langdoh Kongwasan. Kane ka jutang ka long kumno ban pynskhem ïa u pud u sam jong ka Elaka Jowai bad ki pud ki sam, ki riti Dustur jong ki saw lyngdoh ïa kaba la ju pynlong manla ka snem.
U ma Puramon Kynjing ula ïathuh ba kane ka jutang kaba kin ïakren kan long tang kawei ka jingmut da ka jingïasngewthuh jingmut lang ban wanrah ïa ka bha ka miat, ka jingshong suk shong shngaiñ hapoh ka Elaka baroh kawei.
Shuh shuh ula ong ka jingpyndep ïa kane ka Kñia Pyrthat ka long ka bynta kaba khraw ïa ki Langdoh kiba dei peit ïa ki khlaw kyntang ki wah kyntang bad kiwei de ki jaka ba kyntang hapoh ka Elaka Jowai kaba ïar haduh katta katta kaba long ruh ka nong pyndap pynbiang ïa ki jingdonkam u khun bynriew, katba u Dolloi u long tang u nongpeit ïa ki shynshar ka khadar.