Shillong, Naitung 04 : Ka Meghalaya Football Association (MFA) ka bthah ïa baroh ki Sports Club kiba ïalehkai hapoh u pud u sam jong ka Riwar Mihngi S. W & Sports Association (RMSW&SA) ba kin pynthymmai noh ïa ki nongkitkam khnang ba ka RMSW&SA kin ïoh ban ïashim bynta ha ka Meghalaya State League 2022-23 kaban sdang ha u bnai Risaw 2022.
“Ha ka 29 tarik Jylliew 2022 ka Meghalaya Football Association ka la shong ïa ka jingïalang khnang ban pyntyllun ïa ki kam jong ka RMSW&SA bad ngi la rai ban pynlong ka jingïakynduh lang ïa baroh ki nongkitkam ka RMSW&SA bad kiwei ki Sports Club kiba khlem pynïasoh bad ka RMSW&SA ba kan don ka jingïakynduhlang ha ka 23 tarik Naitung 2022 ha Dorbar Hall Neng Gate ha ka por 11 baje mynstep ban jied ïa ki nongkitkam ba thymmai jong ka RMSW&SA,” ong ka kyrwoh khubor na u Bah SS Rapthap General Secretary ka MFA.
Ïa ka jingïalang ha katei ka sngi yn pynïaid da ka MFA.
