Rah ka Ïewrynghep Presbyterian SS, H. Elias bad St. Anthony’s HSS ïa ka Subroto Mukherjee Cup u DSO EKH

Shillong, Naitung 04 : Ka Ïewrynghep Presbyterian Secondary School, H. Elias Memorial Higher Secondary School bad ka bad St. Anthony’s HSS ki la ïoh rah ïa ka nam lahduh jong ka lympung ïalehkai District Inter School Subroto Mukherjee Cup ba la pynïaid da ka ophis u District Sports Officer (DSO) ka East Khasi Hills kaba la poi noh sha kaba kut ha ka sngi Nyngkong.
Ka Ïewrynghep Presbyterian SS ka la ïoh rah ïa ka nam lahduh ha ka kyrdan U-147(Girls) da kaba pynliem da 7-6 pyrshah ïa Umpohliew Jingtip Higher Secondary School ha ka jingïakhun final kaba la long ha madan Third Ground, Polo, Shillong, ka H. Elias Memorial HSS ka la pynliem ïa ka Umphliew Jingtip HSS da 2-1 kol ha ka kyrdan U-14 (Boys) katba ka St. Anthony’s HSS ka la pynliem da 3-2 kol pyrshah ïa ka Umphyrnai Presbyterian HSS ha ka kyrdan U-17 (Boys).
Haba phai sha ka jingïakhun final ki kynthei, ka jingïalehkai ka long kaba ïakhaid bha ha kaba baroh ar ki la thep mar lai kol kaba la pynlong ïa u referee ban rah da ka jingïashut tie-breaker bad dei ka Ïewrynghep Presbyterian kaba la lah ban pynliem da 7-6 kol.
Ïa ki lai kol na bynta ka Ïewrynghep la thep da ka
Na-I-Sha Nongrum (8, 24 & 69 min) katba na bynta ka Umpohliew Jingtip la thep da ka Haphilakhamti (25, 28 & 72 min). Ka jingïakhun final jong ki shynrang (U-14) dei ka H. Elias Memorial Higher Secondary School kaba la pynkhih jar nyngkong lyngba u Ricky Kharkongor kata tang mar ba sdang ka jingïalehkai ha ka minit ba 1.
Ka H. Elias kala bteng biang ban thep kol ha ka minit ba 16 lyngba u Medonbanshan Kurkalang shwa ba u Mebankitlang Mawlong un thep ïa ka shi kol na bynta ka Umpohliew Jingtip ha ka minit ba 36.
Katba ka jingïakhun final kaba khatduh kaba la long hapdeng ka St. Anthony’s HSS pyrshah ïa ka Umphyrnai Presbyterian HSS ha ka kyrdan U-17 (Boys). Ka jingïakhun ka long kaba mar ïabiang bor ha kaba ka St. Anthony’s ka la ïoh ban plie pyrda nyngkong lyngba u Pynshailang Jyrwa ha ka minit ba 13 bad u Balamkupar Rynjah u la thep ïa ka kol pynïakhaid na bynta ka Umphyrnai ha ka minit ba 22.
Da ka jingïathep ba mar shi kol ka jingïakhun ka la nang ïathnem ha baroh arliang ha kaba baroh ar ki la ïakhun tyngeh ban thep kol. Ha ka minit ba 28 u Lurshai Wankhar u la thep ïa ka kol kaba ar na bynta ka Umphyrnai hynrei khlem da ailad u Pynshailang Jyrwa sa shisien u la thep ïa ka kol pynïakhaid na bynta ka St. Anthonys ha ka minit ba 34.
Ka jingïalehkai ka la pynsmiej ïa ki nongkyrshan jong kitei ki ar tylli ki skul bad ap kyrmen ïa la ka jong ka kynhun ban thep kol, hynrei dei ha ka minit ba 70 u Fabio Rymbai u la thep ïa ka kol kaba lai na bynta ka St. Anthony’s Higher Secondary School kaba la ïoh rah syndon ïa ka nam lahduh.
Ha kane ka jingïalehkai final jong ka District Level Inter School Subroto Mukherjee Cup 2022 la wan ban sakhi lang u Bah Aiborlang Khongjee uba dei u rangïalehkai barim ka ri India uba la mih madan ha ka Indian Super League bad u coach ba mynta jong ka Rangdajied F.C kum u kongsan ha ryngkat u samla Bah Aiban Dohling uba dei u player ka Goa F.C kum u symbud kongsan.
La ïadonlang ruh u Principal jong ka St. Anthony’s Higher Secon-dary School, Shillong u Father Anthony Khar-kongor, Principal jong ka H.Elias Higher Secondary School, Shillong Brother Anand P Lakra, Principal jong ka Umphyrnai Secon-dary School Kong Biriscy Kharumnuid bad u District Sports Officer jong ka East Khasi Hills nalor kiwei pat ki ophisar jong ka tnad ïalehkai.
U kongsan haba ai jingkren u la kyntu ïa ki khynnah skul ba kin trei shitom, ban long kiba don akor bad ban ym kynran dien khnang ba shisien ka sngi kin sa long ki player ba tbit tam . Ki skul kiba jop kin ïoh ban mihkhmat ïa ka East Khasi Hills District na bynta ka State Level kaban sa long ha u Nailar.