Shwa ban poi ki ar tylli ki jingïaseng ha u 2026, jurip u MLA ïa ki surok ha Mawten
Mawkyrwat, Naiwieng 13: U MLA ka Mawkyrwat Constituency Bah Renikton Lyngdoh Tongkhar ha ka sngi Palei ryngkat ki ophisar jong ka tnad PWD (Roads) ki la hiar jurip ïa ki surok shnong kiba don ha shnong Mawten, South West Khasi Hills District.
Kane ka jingleit jurip ïa ki surok ka long kum shibynta na ka jingpynkhreh ïa ki ar tylli ki jingïaseng kata ka Jingïaseng jong ka Mawkyrwat Presbytery jong ki Rangbah ka ban long ha ka Balang Presbyterian Mawten ha u bnai Rymphang, 2026 bad ka Jingïaseng jong ka Bible Society, Mawkyrwat Branch ha ka Balang U Blei M&A Mawten ha ka taïew ba khadduh jong u bnai Lber, 2026.
Hadien ka jingjurip, u Bah Renikton haba kren sha ki lad pathai khubor, ula ïathuh ba ka jingthmu jong u ban leit jurip ïa kitei ki surok shnong ryngkat ki heh ophisar ka tnat PWD (Roads) ka long kum shibynta jong ka jingpynkhreh ba kan long kaba bit ba biang ha ka leit ka wan jong ki kali lyngba ki surok hashwa ka jingwan jong ki Jingïaseng Heh ha shnong Mawten.
U la ïathuh ruh ba napdeng kitei ki surok kiba ka tnat PWD (Roads) ka la pynkhreh ki long ruh ban pynbha bad maramot ïa ki surok shnong ba la don lypa namar ki la long sniew shaba palat bad kumjuh ruh ban siang rong thymmai ha ki katto katne ki bynta jong ki surok shnong ban pyllait na ka jingdheng kali ha ki por long Jingïaseng.
“Ka shnong Mawten ka la long ruh ka nuksa ba bha na ka bynta kiwei de ki shnong hapoh ka dong ka thaiñ bad ka Ri Khasi baroh kawei ha kaba lada wan ka jingtih ïa ki surok hapoh jong ka shnong ki trai jaka kim bynnud satia ban ai ïa ki kper ki phrah ban shna surok na ka bynta ka jingbit jingbiang jong ka lawei ka pateng ban wan namar ki don ha ki ïa ka jingjynsur mynsiem”, ong u bah Renik bad u da pyrto ruh ryngkat ka jingkhublei kyrpang ïa ki paidbah jong shnong Mawten baroh kawei.
Kiba la ïa donlang ha kane ka sngi ki long naduh u bah L. Lyngdoh, Myntri Shnong Mawten, u bah J.A. Nongsiej, Executive Engineer ka PWD (Roads) Mawkyrwat Division, u bah B. Shylla, Sub Division Officer ka PDW (Roads) ka Mawkyrwat Division lem bad ki rangbah jong ka Shnong Mawten lem bad ki nongïalam jong ki Balang.