Jowai, Naiwieng 12: Hadien ka jingdawa jong ki samla pule ka Jowai Polytechnic ïa ka jingdonkam ban don ïaka madan ïalehkai phutbol bad kumjuh ïaka madan Basketball hapoh katei jaka pule, mynta ka sngi Balang 12 tarik u Naiwieng, 2025 u ma Wailadmiki Shylla ula leit jurip dalade hi ïa ki ar tylli ki jaka ban shna ïa kitei ki madan ïalehkai.
Ha kane ka sngi u Myntri ula kular ban pynïoh ïa kitei ki madan ïalehkai da kaba kyntu ïa u Chief Engineer ban pynkhreh nadong shadong ïa ka Estimate bad ban ïoh sanction pisa ïa kitei ki ar tylli ki madan ha Jowai Polytechnic, da kaba ong ba ka kam ïalehkai Sports bad pule puthi ka dei ban ïaid lang haka juh ka por.
Haka jingïadei bad ki tiar ki tar kiba donkam na ka bynta ka rukom ai jinghikai hapoh katei ka Jowai Polytechnic, u myntri ula kular ban leh ïa kaba donkam katkum ka juk ba mynta bad ban ïakren ïa kane bad ka sorkar jylla na ka bynta ka jingbha jingmiat jong ki Polytechnic ha baroh ka jylla.
‘Kumba long mynta donkam ban wanrah sa kiwei de ki laiñ pule hapoh ka Jowai Polytechnic khnang ba ki samla pule kin ïoh jingmyntoi’ ong u myntri, hynrei kaba donkam mynta dei ban ïoh shwa ïa ki jingtei (Infrastructure) kiba biang, namar ïa kane ka jingpule Diploma ka sorkar kala thrang eh ban pynkiew ïa ki samla pule hapoh ka jylla bad ka Ri hi baroh kawei.
