Jowai, Naitung 03: Ki pulit jong ka West Jaiñtia Hills District ha kane ka 1 tarik mynta u bnai haka por 10 baje shiteng mynmiet kila ïoh kem ïa hynriew (6) ngut ki nong Africa na kawei ka kali Tourist kaba don ïa u Registration no ML 05 T 3049 na u surok bah NH-6 ha Ummulong katba ki pulit ki dang pynlong ïa ka jingïaid Patrolling.
Ïa kine ki 6 ngut ki nong Africa la tip kyrteng kum u Enock Kwabena-29 snem na ka ri Ghana, u Olaleye Joseph Mayowa-26 snem na Nigeria, u Moses Zutah-24snem na Ghana, u Guilavogui Victor-25 snem na Guinea, u Kehinde Edris Olayimka-26 snem na Liberia bad u Vidal Luis Chissano-25 snem na Mozambique
Ki pulit hadien ka jingjurip bniah ïa kitei ki nong Africa la lap ba ki lai ngut napdeng jong ki ki biang ïa ki kot pynshisha bad la pyllait noh ïa ki haka 2 tarik, katba ïa kitei ki 3 ngut pat ki bym biang satia ïa ki kot ki sla la kem bad la pynngat syndon ïa ki katkum ki kyndon aiñ.
La ïathuh ba kitei ki hynriew (6) ngut ki nong Africa ki dang mih na Guwahati bad leit ïalehkai phutbol sha East Jaiñtia Hills District.
