Ranji Trophy 2025-26: Khur ka M’laya ïa ka jingjop kaba khraw tam; da ka Inning bad 446 ron pynliem ïa ka Arunachal
Shillong, Naiwieng 10: Ka Meghalaya ka la buh dak ïa ka rekod jingjop kaba khraw tam jong ka ha ka Ranji Trophy da kaba pynliem ïa ka Arunachal Pradesh da ka Inning bad 446 ron ha ka sngi kaba lai jong ka jingïalehkai plate group hapdeng jong ki, kaba la long ha Surat hynne ka sngi Nyngkong.
Haba wan ban bteng ïa ka pali tied kaba ar (2nd Inning) na ka ka 29/3 hynne ka step, ka Arunachal ka la shah pynkhyllem noh baroh ki wiket tang na bynta 109 ron. Kane kadei hadien ba ka la kamai tang 73 ron ha ka pali tied ba nyngkong jong ka ban jubab ïa ka thong kaba khraw jong ka Meghalaya kaba la pynkut ïa ka pali tied ba nyngkong da 628/6.
U Aryan Borah u la ïaid shakhmat ban khur 3 wiket bad ailad tang 45 ron na ki 16 ober, katba u guest player u Ajay Duhan (2/0 na ki 1.4 ober), u Aaron Nongrum (2/8 ha ki 6 ober) bad u Akash Chaudhary (2/29 ha ki 8 ober) ki la ïoh ban pynhap mar 2 wiket.
Ka jingjop kaba heh tam jong ka Meghalaya mynshwa ka long pyrshah ïa ka Mizoram da kaba tam kput haduh shi inning bad 425 ron ha ka samoi ïalehkai 2019-20 jong ka Ranji Trophy.
Ki la don shibun ki rangïalehkai jong ka Meghalaya kiba la tyngshaiñ ha kane ka jingjop ba khraw – kiba kynthup ïa u Arpit Bhatewara, uba la kamai ha ka sien kaba ar ïa ar tylli ki spah ron (207) ha ka kyrdan kriket ba la paw, ka spah ron kaba ar jong u Kishan Lyngdoh (119) ha kane ka samoi, ka spah ron kaba nyngkong jong u guest player u Rahul Dalal (144) na ka bynta ka Meghalaya, nangta ka 50 ron kaba stet tam jong u Akash ryngkat ka rekod da kaba thlieh hynriew tylli ki six ha ka shi ober – hynrei na ka liang jong ki nongpynïaid ki la jied ïa u Arpit ban khur ïa ka khusnam Player of the Match.
Kane kadei ka jingjop kaba nyngkong jong ka Meghalaya ha ka samoi ïalehkai 2025-26 hadien ba ar tylli na ki lai tylli ki jingïalehkai ba la dep ki la kut noh ha ka jingïakhaid katba kawei pat ka la shah iehnoh khlem da ïoh ban ïaid shakhmat wat tang shi ober.
Ka Meghalaya kan dang sah ha Surat na ka bynta ka jingïalehkai kaba bud, ka ban long pyrshah ïa ka Manipur naduh ka 16 Naiwieng.