Sam syrnot sha ki 30 ngut kiba pyndep ban long Security na ka MPSS Training Centre

Jowai, Naiwieng 03: Ka Skills Meghalaya kaba pynïaid da ka Tribal & Rural Social Foundation mynta ka sngi 3 tarik u Naiwieng 2025 kala ïoh ban sam ïa ki syrnot sha ki 30 ngut ki khun samla kynthei bad shynrang kiba la pass bha ïa ka Training Unarmed Security Guard kaba la pyllong ha MPSS Training Centre Thadmuthlong-C Phramer West Jaiñtia Hills Meghalaya.
Ïa ka jingïalang ha kane ka sngi la pynïaid da samla F. Talang iba long ruh i MIS Coordinator Tribal & Rural Social Foundation. Shwa ban sdang ka jingsam syrnot la ïoh ban pyndeng syntiew ïa u kongsan bad ïa baroh ki nongshah khot sngewbha.
U Bah Pyndaplang Muksor uba long ruh u Managing Director jong ka MPSS Security Training Centre haba kren ha kane ka sngi ula pynkynmaw ïa ki samla kiba pass ba ki dei ban kynmaw ba kane ka syrnot kaba ki ïoh mynta ka sngi kan long kum ka waitlam ka ban pom ïa ki jingeh haka jingïaid lynti jong ki bad kum ki khun samla kim dei ban sahkut ha juh hynrei ki dei ban nang ïai trei shitom ban poi sha ka thong kaba ki don hapoh ka mynsiem jong ki.
U ma L .Suchen SDO MSSDS West Jaiñtia pat haba kren kum u kongsan ula ïaroh ïa kine ki khun samla kiba la pass bha ha kane ka training jong ki. Ula kitbok kitrwiang ïa ki baroh da kaba ong ai ba kane ka syrnot kaba ki la ïoh kan long ka lad ka kabu ïa ki ka ban ïarap haka liang ka jingwad kam wad jam khamtam ha kane ka pyrthei kyrduh kam. Shuh shuh ula ai khublei kyrpang ïa ki nongpynïaid jong ka MPSS Security Training Centre kiba la shim khia ban hikai bad ban pyntbit ïa kine ki khun samla hapoh kine ki bnai ba ki don ha kane ka training Centre.
La ïoh ban sam ïa ki syrnot sha baroh kine ki Lai phew (30) ngut ki khun samla kiba la pass bha ïa kane ka training kaba la tip kum ka Skills Meghalaya.
Ha kane ka juh ka sngi la ïoh ruh ban pynkup burom ïa kawei kaba long ka Instructor kane ka training Centre, ka samla R. Lapasam da kaba pynkiew ïa ka rank jong ka na ka shi khlur sha ka Ar khlur.
Ïa ki kyntien ai khublei bad kyrkhu kyrdoh la ïoh na i samla D. Lipon iba long ruh i Centre Manager jong ka Tribal & Rural Social Foundation.