Ka ïing bilor plastik ka nongmuna ba la shna da ka MTEPS hajan ka kshaid Moopun

Khliehriat, Naiwieng, 02: Ka shnong Mutong kawei na ki shnong ha East Jaiñtia Hills District ka dei kaba la paw bha ha ki kam jngohkai pyrthei namar ka jingdon ka kshaid Moopun. Hajan ka kshaid, ka don ruh kawei ka ïing rit ba la shna da ki bilor plastik.
Kane ka ïing plastik ka dei ka nongmuna ba la tei nam da ka Mutong Tourism and Environment Promotion Society (MTEPS) ba la lamkhmat da u President u Bah Helping Phawa kaba long ka nuksa ïa kiwei ba kumno yn pyndonkam biang ïa ki plastik kiba la shu bret pathar.
U Bah Helping Phawa u la ïathuh ba ïa ka ïing la shna ha u snem 2024 na ki plastik ba la lum naduh u snem 2018.
U la ïathuh ruh ba ka Soceity ka dang don ïa ka jingthmu ban pynlong ïa ka shnong ka thaw bad ïa ki shnong ba marjan kiba lait na ki jingjaboh jong ki plastik ba la shu bret pathar.
“Naduh u bnai Nailur, 2017 ha ka por ba ka Society ka rakhe ïa ka World Tourism Day mynba nga dang bat ruh kum u Waheh Shnong ka shnong Mutong, dei hadien ba ladep plie ïa ka jaka peitkai kaba don hapoh shnong, ka Society ka la kwah ruh ban pynkhuid ïa ka shnong ka thaw naduh ka shnong Kongong shaduh Lumshyrmit. Na kata ka daw, ki nongïalam, ki dkhot lem bad ki nongshong shnong ki la lum lang ïa ki plastik kiba la shu bret pathar,” u la ong.
“Ha u snem 2018 ka Society ka la pynlong noh da ka Plastic Festival kaba lah ban ong ba dei ka tamasa kaba nyngkong eh ha ka ri India bad ha kane ka tamasa ka Society ka la pynlong kum ka jingïakop lum plastik bad ha katei ka por ka Society ka la rai ruh ban ai da ka khusnam pisa ïa kiba jop ha ka jingïakop pynlang plastik bad dei ha u snem 2018 ruh ba la pynlong ïa ka prokram ai jingpynshai ha ïew Ladrymbai,” u la bynrap.
“Ha ka jingpynshai paidbah ha u snem 2018 ngi la lum ïa ki plastik na Ladrymbai bad la pynkit da ka bos bad ka trok sha ka shnong Mutong. Kane ka la long kum ka nuksa ïa kiwei ki shnong namarba ka Ladymbai ka dei ka ïew kaba paw bha ha East Jaiñtia Hills District bad kumta ki bun bha ki plastik kiba la shu bret pathar. Ynda la pynpoi ïa ki plastik ha shnong Mutong ngi la khot bad bthah ïa baroh ki nongtrei shispah sngi ba kin wanrah ïa ki bilor plastik bad hapoh ki bilor plastik la thep pynkhapngiah smam da ki plastik barit, kum ki palstik mitmit, plastik chewing gum, plastik chips bad kiwei kiwei ki plastik bad ynda ki la lang shibun ngi la shna ïa ka ïing plastik. Dei ha u snem 2018 ka Mutong Tourism and Environment Promotion Society ka la phah ruh haduh 2500 tylli ki bilor plastik kiba la thep da ki plastik sha NEHU namarba ki bor pynïaid jong ka skulbah NEHU ki la pan ïa ki plastik ban buh ha ka Museum ha NEHU,” la ïathuh u Bah Phawa.
U la ïathuh ba u la ïoh buit ban shna ïing da kine ki bilor plastik dei lyngba ki arngut ki nongjngohkai pyrthei na nongbah Kolkata, West Bengal kiba la wan ban ïashim bynta ha ka Plastic Festival 2018 kiba la ai jingmut bad hikai kumno ban shna miej, shna mula ban shna ïing da kine ki bilor plastik.
U la ong ba ka prokram lum plastik jong ka Society ka long shibynta ban pynkhuid ïa ka mariang namarba ka Society ka angnud ban ïada ïa ka mariang bad ïa ki sawdong sawkun.
Ha ka tamasa Latuthin Festival 2025 ba la pynlong da ka East Jaiñtia Tourism and Environment Promotion Society (EJTEPS) kaba u Bah Helping Phawa u la long kum u President, ka la pynlong ruh ïa ka tamasa khar plastik.
Ha u snem 2024 kiba jop ha ka jingïakop lum plastik ki dei na shnong Tuber namarba ki paidbah ka shnong Tuber ki la lum ïa ki plastik da ka jingthmu ban phah sha ki karkhana pynmih dewbilat hynrei namarba ka don ka jingïakob kumta ki la thep noh ïa ki plastik baroh hapoh ki bilor plastik bad phah sha ka Society. Ha ka por ba la pynlong ïa ka plastic Festival ki la ïoh khur ïa ka khusnam da ka song pisa bad mynta u snem ruh ka East Jaiñtia Tourisn and Environment Promotion Society kan pynlong ïa ka Latuthin Festival ha ka shnong Jalyiah East Jaiñtia Hills Disrict bad ka kyrpad ïa kiba lum ïa ki plastik ba kin pynpoi ïa ki plastik ba la thep dap smam da ki plastik ha ka 12 tarik, Nohprah 2025 kaba dei ka sngi ban pynkut ïa ka Latuthin Festival 2025 ha ka shnong Jalyiah.
“Ka jingthmu jong ngi mynta ka long ban kane ka Platic Festival kam dei shuh tang hapoh rilum Jaiñtia hynrei dei ban long ha baroh kawei ka jylla Meghalaya ha kaba ki nongshong shnong jong ka jylla ki lah ban lum ïa ki plastik bad ban pynpoi ïa ki plastik sha ka Society ha ka 12 tarik, Nohprah, 2025. Kiba jop kin ïoh khur ïa ki khusnam da ka song pisa,” la ong u President jong ka East Jaiñtia Tourism and Environment Promotion Society.
U la ïathuh ba ka khusnam na ka bynta kiba jop ïa ka nam lahduh kin ïoh khur ïa ka song pisa kaba T. 50,000, ka khusnam kaba ar T. 25, 000 hajar, ka khusnam balai ka long T. 15000 hajar, ka khusnam basaw T. 5,000 hajar bad ka khusnam basan T. 3,000 hajar.