Shillong, Risaw 27: Ka kynhun ki nongïalehkai Karate jong ka East Khasi Hills ki la bteng ban bat ïa ka nam lahduh ha ka kyrdan jong ki shynrang bad kynthei da kaba jop ïa ka nam Overall Champion ha ka 31th State Karate Championship 2025, kaba la pynhap pyrda noh ha ka sngi Saitjaiñ.
Kane ka lympung kaba lai sngi lynter, la pynlong ha JN Indoor Stadium, Polo, la pynlong da ka All Meghalaya Karate-Do Association (AMKA) ha ryngkat ka jingkyrshan na ka tnad ïalehkai jong ka Sorkar Jylla Meghalaya.
Ha kane ka sienjam kaba 31 ki la don haduh 512 ngut ki nongïalehkai Karate na ki 8 tylli ki distrik kiba la wan ïa shimbynta, kaba long ka jingkiew na ka jingkheiñ jong u snem 2024 kaba long 456 ngut ki nong ïa shim bynta. Ki nongïalehkai kidei kiba naduh ka rta ba 6 snem haduh ka kyrdan senior ki la pyni ïa la ki jong ki sap ki phong ha ka kumite (sparring) bad ka kata (choreographed movement demonstration).
Ka West Khasi Hills ka la wan ha ka kyrdan ba ar (runners-up) ha ka liang jong ki shynrang bad ka Ri-Bhoi ka la ïoh ïa ka kyrdan ba ar (runners-up) ha ka liang ki kynthei.
La pynhap pyrda noh ïa ka lympung da u Myntri sorkar u Bah Sanbor Shullai MLA kum u Kongsan. Ha ka jingkren lyngkot u la ai ka jingïaroh ïa ki samla namar ka jingaiti lut jong ki ha ka jingïalehkai ba ki la jied bad u la ai khublei ruh ïa ki kmie ki kpa kiba la kyrshan ïa ki ha ki jingpyrshang jong ki. U Bah Sanbor u la ïathuh ruh ba u la ïalehkai Karate ha ka por ba u dang samla ha ka por ba ki nonghikai ki dang duna bha ha Meghalaya, lait noh tang u Stephan Leong, uba la khlad noh.
Ka Karate mynta ka la kiew bha bad ka la suh ïa ki tynrai kiba jylliew ha ka jylla, kumba la ong da ka Kong Matsiewdor War Nongbri, kaba la wan Kongsan ha ka sngi sdang ïa kane ka lympung.
Ka kyrdan jong ka karate ka la nang kiew man la u snem bad u snem 2025 ruh um shym la pher. Da ka jingwan jong ka National Games 2027, kaba ka Meghalaya kan sa pynlong, kaba sah sa tang shisnem tam khyndiat, ki nongïalehkai karate ki pynlut por da ki kynta, ki taïew bad ki bnai ha ka jinghikai jong ki bad ki soh ki la dep ban sei soh.
Ha kane ka sngi la sam ruh saw tylli ki khusnam shimet na ka bynta ka nam ‘Best Karate’ bad baroh saw tylli ki khusnam ki la leit sha ki nongïalehkai jong ka East Khasi Hills – u Ferrando Wanniang (Junior Boys category), u Ferdinand Samkupar Rani (Senior Men), ka Emika Deimaia Myrthong (Junior Girls) bad ka Rebeka Nongspung (Senior Women).
