Shillong, Risaw 27: Ki jingïalehkai group stage jong ka lympung Meghalaya Women’s State League 2025 kaba nyngkong eh ka la poi sha kaba kut ha ka sngi Nyngkong, 27 tarik Risaw 2025, ha kaba ka Laitkor SC ka la pynkut ïa ka jingïakhun ha khlieh duh jong ka Group A hadien ba ka la pynliem noh ïa ka Pay For Right Football Academy da 2-1 ha ka jingïalehkai kaba long hynne ka step ha madan First Ground-SSA Stadium, Polo.
Baroh ar tylli ki kynhun kidei jong ka Shillong Sports Association bad baroh ar ki la jop ïa baroh lai tylli ki jingïalehkai ba ladep shuwa kane. Ka Laitkor, kaba dei ka lahduh jong ka SSA Women’s League 2024, ka la khmihlynti bha ban pynjlan ïa ka jingsynshar jong ka pyrshah ïa ka PFR, kaba la wan ba ar (runners-up) ha ka Women’s League jong ka SSA.
Ka la don tang kawei ka kol ha ka kylla step, ba la thep da ka Inrila-i-dor Khongthaw (6′) hynrei ka nongthep kol kaba shyrkhei jong ka kynhun, ka Iaraplang Nongrum (53′) ka la pynjlan ïa ka kol lamkhmat na ka bynta ka Laitkor tang hadien katto katne minit ba la ïaid ka kylla miet. Ka PFR ka la ïoh ba kan pynphai shi kol lyngba ka Nisilia Majaw (64′), hynrei ka Laitkor ka la lah ban bat skhem ïa ka kol lamkhmat jong ka tad haduh kaba kut.
Ha kawei pat ka jingïalehkai kaba khatduh ha kane kajuh ka Group ka la long ha ka sngi saitjaiñ, ha kaba ka Attacker’s Youth Club jong ka Ri-Bhoi District Sports Association ka la pynliem noh ïa ka Lapalang SSCC jong ka Riwar Mihngi Football Association da 9-0 kol. Ka Pynibha Rangthaluh (14’, 19’, 29’, 70’, 79’, 81’) ka la lah ban thep hat trick ar sien ha kane ka jingïakhun, katba kiwei pat ki kol la bynrap da ka B Pyngrope (31′) bad ka Damika Rani (62′, 65′). Kumta ka Attacker ka la pyndep ha ka kyrdan ba saw, katba ka Lapalang sha trai duh ha ka kyrdan ba san.
Baroh ar tylli, ka Laitkor bad ka PFR ki la dep ban pynthikna ïa ka jaka jong ki ha ka QuarterFinal shuwa ka jingïakhun hynne ka sngi Nyngkong, ha kaba kane ka jingïakhun ka long tang ban rai mano ban wan ba nyngkong bad ba ar ha ka Group. Kawei pat ka kynhun ban ïohrung napdeng ki 5 kynhun na ka Group A ka dei ka Na Rympei FA kaba wan ha ka kyrdan kaba lai (na ka Ri-Bhoi District Sports Association).
Kaba heh tam na baroh kadei ka Group B, ka don haduh hynriew tylli ki kynhun kiba ïakhun bad tang saw tylli kiba wan hakhmat eh kin jam shakhmat. Kine ki long ka Mawlum Tyrsad SC (Tyrsad Area SA) kaba la kamai 13 poiñ, ka Jakrem SC (Mawkyrwat DSA)-12 poiñ, ka Bright Future SSCC (Pyndengumiong DSA) da 7 poiñ bad ka Mawten SC (Mawkyrwat DSA) da 4 poiñ.
Da tang ar tylli ki kynhun kiba don ha ka Group C, tang ka nongjop – ka Diengshynrum SC (East Jaintia Hills District Football Association) kaba la kamai 6 poiñ – kan ïoh ban bteng ïa ka jingïakhun sha ka knock out stage
Ka Meghalaya Football Association kan sa pynbna ïa ki tarik bad jaka ban pynlong ïa ki jingïalehkai knockout ha ki sngi ban wan.
