Ranji Trophy 2025-26: Lyngba ar tylli ki spah ron u Arpit lamkhmat ka Meghalaya ïa ka inning kaba nyngkong

Shillong, Risaw 27: U Arpit Bhatewara u la kynjoh ïa ka thong ba shyrkhei da kaba kamai ar tylli ki spah ron (double century) na ka bynta ka Meghalaya ha ka jingïalehkai pyrshah ïa ka Sikkim ha ka sngi kaba lai jong ka jingïakhun Ranji Trophy 2025-26 plate group ha madan MCA.
Da kaba ïaineh haduh kaba kut jong ka Inning tied jong ka Meghalaya baroh kawei, u Arpit u la long u nongtied ba khatduh bad u la shah pynkhyllem thik na ka bynta 200 ron, ka jingïalehkai kaba seisoh kaba kynthup ïa 25 tylli ki saw ron (fours). Ka Meghalaya ka la lah ban kamai 405 ron, da kaba tam 59 ron ïa ka Sikkim kaba la kamai 346 ron ha ka inning kaba nyngkong jong ka.
Ha ka tied, ka Sikkim ka la kamai 96/2 ha ka inning kaba ar, da kaba lamkhmat da 37. Watla ka dang don ka lad ban ïoh ïa ka jingjop, hynrei ka jingïakhaid ka long kaba la khmihlynti bha lymda ka Meghalaya ka lah ban pynkhyllem noh ïa ka kynhun ki nongtied jong ka Sikkim ha ka sngi ba khatduh mynta ka sngi.
Ka la long ka jingsdang kaba sniew na ka bynta ka Meghalaya ha ka por mynstep, namar ba ka la duh noh ïa u Kishan Lyngdoh uba la kamai 102, ha kaba une u nongtied ba tbit bha u la khyllem noh na ka bol kaba ar kaba u la ïakynduh khlem da pyndap shuh ïa ka ron kaba u la kamai ha ka sngi ba ladep. Kaba kham pynduh mynsiem ka long ba ha ka bol kaba bud, u guest player ba thymmai u Rahul Dalal u la shah pynhap noh ha u juh u nongkawang bol, u Kranthi Kumar.
Nangne u Kranthi u la jam shaphrang ban weng noh ïa arngut ki nongïalehkai ba shadien ban pynkut ryngkat ka jingkheiñ kaba bha, katta ban khur 6/86, ka jingïalehkai kaba nyngkong eh jong u ban ïoh pynhap 5 wiket tam ha ka kyrdan ïalehkai kaba kham heh.
Ha kawei pat ka liang, u Arpit u la nang duh paralok. Ka jingïatreilang kaba bha tam jong u kadei bad u Aryan Borah, uba ka kamram jong u ka long tang ban neh slem haduh ba u Arpit un kynjoh ar tylli ki spah ron (double century). U ne u nongkawang bol spin u la lah ban pynneh ïalade khlem da shah pynhap na ki 23 tylli ki bol ba u la ïakynduh. Hynrei ka daw kaba la pynkut noh ïa kane ka jingïatreilang kadei hadien ka jingpyrshang jong u Arpit ban mareh ban ïoh ïa ka ron, kaba la pynsah ïa baroh arngut ki nongtied ban sahkut ha kajuh ka jaka ka bym dei ban tied. Nangta u Aryan u la aiti noh ïa ka wiket jong u ban pyllait im ïa u Arpit bad khatduh u la lah ban pynurlong ïa ka thong jong u ban kynjoh sha ka ar tylli ki spah ron.
Kaba kongsan ka long ba ka Meghalaya ka la ïoh lamkhmat ha ka inning kaba nyngkong hynrei kam shym la long satia kaba bun bad ka Sikkim ka la lah ban pyndap ïa ka jingduna, watla ka la hap noh ar wiket haba bteng ïa ka inning tied kaba ar ha u Akash Chaudhary (2/30).
Ki Sikkim ka dang don ïa u Ashish Thapa (49 not out) bad u K Sai Satwik (19 not out) ha ka por ba la pynkut noh ïa ka sngi ba lai jong ka jingïakhun.