Shillong, Risaw 26: Hadien ka jingsdang kaba paka ïa ka lympung Sub-Junior Boys National Football Championship 2025-26 (Tier 2), ki khynnah ïalehkai jong ka jylla Meghalaya mynta kin aireng pyrshah ïa ka Andhra Pradesh ha kane ka sngi Ba-ar. Kane ka jingïalehkai kan sdang ha ka por 8 shiteng mynstep.
Ka Meghalaya ka la sdang ïa ka jingïalehkai jong ka ha kane ka Championship da ka jingjop kaba shongkun hadien ba ka la pynliem noh da 6-1 kol ïa ka Chhattisgarh ha Narainpur.
Ka Meghalaya ka la pynskhem ïa ka jingjop da kaba thep saw kol tang ha ka kylla step lyngba u Macstar Nongkynrih (33′), u Marbiang Marwein (34′, 34′) bad u Wanpyndapbor Nongsiej (45’+2).
Nangta ha ka kylla miet u Iaishanborlang Khongjee (69′, 78′) u la thep ar tylli ki kol, katba ka shi kol jong ka Chhattisgarh kadei kaba la thep ha ka minit kaba 72. Ha kaba kut jong ka jingïalehkai u Marbiang u la ïoh khur ïa ka nam Player of the Match.
Da kane ka jingjop, ka Meghalaya, kaba la long coach da u Bah Dapmon Tariang, ka la lamkhmat ha khlieh duh jong ka Group C. Tang ka kynhun kaba wan ha khlieh duh na kawei pa kawei na ki saw tylli ki Group kin ïoh rung sha ka semifinal, kumta ki khynnah shynrang jong ka jylla kin hap ban ïai bteng ïa ka jingïalehkai kaba kyrpang jong ki khnang ban ïaid shakhmat.
