Ha ka sngi pynkut ïa ka School Week 2025, 5 lak mang u MLA ïa ka St. Mary’s HS, Mawthong
Mawkyrwat, Risaw 26 : Ka St. Mary’s Higher Secondary School, Mawthong ha ka sngi thohdieng jong ka taïew kaba dei 24 tarik u Risaw, 2025 ka la ïoh ban pynhap pyrda noh ïa ka 2nd School Week 2025 ha kaba u bah Renikton Lyngdoh Tongkhar uba dei u MLA jong ka Mawkyrwat Constituency u la long kum u kongsan.
Haba ai jingkren ha ka jingïalang, u bah Renikton Lyngdoh Tongkhar uba dei u MLA jong ka Mawkyrwat Constituency ula kular ban mang pisa kyrpang T. 5 lak tyngka na ka SRWP kaba dei na ka MLA Skhim nalor ba ula dep ban ai ha kine ki snem ba la dep T. 5 lak tyngka kaba la kot mynta sha ka T. 10 lak tyngka na ka bynta ban shna pynbha ïa ki jaka shong (Sitting Gallery) hajan jong ka madan ha khmat ka Ïingmane jong ka Balang Catholic Mawthong.
Ym tangkata, ha ka jingkren jong u ula ai mynsiem ruh ïa ki khynnah skul ban don jingkyrmen ba nangne ka shlem pule kin sa mih ki khynnah kiba stad ki ban sa long ki nongïalam niam kum ki Phadar, ki Sisters, ki Nonghikai, ki Ophisar sorkar bad ym lah ban tip ruh ïa ka ban sa wan kin sa mih ruh ki nongmihkhat kum ki MDC, ki MLA, ki Minister bad ki ‘riew khraw kiba paw ha ka pyrthei baroh kawei.
Shuh shuh u la ai ka jingïaroh ïa ki ‘riew niam jong ka Balang Catholic kumba la tip ba ki shlem pule kiba ju pynmih ïa ki ‘riewkhraw kiba paw, ha ki kyrdan bapher bapher ki dei na ki shlem pule kiba la seng da ki riewniam jong ka Balang Catholic, bad kiwei de ki kynhun Balang bapher bapher.
Ha kane ka sngi la ïoh ruh ban sam ïa ki khusnam sha ka Red House kaba la ïoh rah ïa ka nam lahduh kaba la ïoh ban khur bun tylli ki khusnam ha kane ka 2nd School Week 2025 ha kaba na ka liang ka skul ka la ïoh ban pynïalehkai ïa shibun ki jait jingïalehkai da ka jingthmu ban ailad ïa ki khynnah skul ba kin pyni ïa ki sap ki phong ki bapher bapher ba kin long shlur ha ki kam ïalehkai baroh.
Kiwei de kiba la ïadonlang lang ki long u Rev. Fr. Herodest Lyngdoh uba dei ruh u Principal jong ka St. Mary’s Higher Secondary School, Mawthong, ki nonghikai bad ki bad ki khynnah skul.