Paralok ba ieit, ngi tip ba U Blei U la thaw ïangi daka ba pynkyrpang na pdeng ki jingthaw ba im ha pyrthei baroh. Kumta ngim long shuh ki sohpyut ki bym don dor ei ei, kumta ngim dei ban im mata madei lane pynleh noh-ei ïaka jingim ba kordor eh jong ngi dakaba leh ïaki kam bymman, daka ba bam thala dih thala kham tam ki jingbam jingdih bashiew kiba pynjot ïaka met bad ka mynsiem kum ka biri sikret khamtam eh ka kyiad ka drugs ki kanja lane kiwei kiwei de ki jingbam jingdih ba sniew.
Ngi ki briew ruh haba ngi shna ïakino kino ki tiar ngi don lypa ka plan kumno ban pyndonkam ïaki. Ngim shna khlem don jingmut jingthmu lane tip lypa kumno ban pyndonkam ïaki. Kumta U Blei ruh haba U thaw ïa ngi U don ka jingmut jingthmu naka bynta jong ngi. Bad kata ka jingmut jingthmu jong U ka long ban tip ïa U ban ieit ïa U bad ban shakri ïa U.
Nyngkong, eh kumno ngin tip ïa U? Ngi lah ban tip ia U lyngba ka ñiam ka rukom kaba ngi don. Jan baroh ki ñiam haka pyrthei ki hikai shaphang U Blei bad shaphang ka lynti ka jingshisha hala ki jong ki jong ki jinghikai bad ki nongrim ba ki don.
Ngi lah ban tip ïa U Blei lyngba ki jingthaw jong u kiba ngi ïoh i haka ne ka pyrthei.
Nga kynmaw ïakato ka jingïathuh khana kaba ngi ïoh ban pule mynba ngi dang leit skul haka subject Moral Science shaphang ki arngut ki nongleit jingleit kaba ïathuh kumne; Arngut ki nongleit jingleit ki leit poi haka wei ka rishyiap kaba ïar had ba heh bha. Ynda meit, ki ïa pynieng dara bad sah miet hangta. Shwa ban thiah, uta u wei uba ngeit Blei u duwai bad uta u bym ngeit pat u rkhie beiñ ïa u . Hynrei um sngap ne jubap ei ei u sngap laka sngap bad pynkut ïaka ta ka jingduwai jong u.
Mynmiet katba ki dang ïoh thiah, don ki ut kiba ïaid lynti nangta na khmat ïingjaiñ jong ki hynrei kim ïoh angew namar ba ki ïa ïoh thiah. Ynda shai mynstep u khie shwa u ra u bym ngeit Blei, u ïohi ïaki ta ki dienjat ut bad u kyrsiew i’u ta u wei u ong, “Khie me, peit ki ut kiba iaid nangne na khmat iingjaiñ jong ngi, katta ruh ngi khlem ïoh sngew ei ei”. U ta u lok ruh u khie noh naba thiah bad u duwai shwa, jia ryngkhat thik haka por mihsngi.
Haba uta u bymngeit blei u ïohi ba u duwai u krein beiñ bad ong ïa u, “Me sia te beij shisha mo! Kumno me ngeit ia u ta u blei? Hato me ïoh sngew ia u, me ïohi ia u, me tip hangno u don?” Katta ruh um pynphai ktien ei ei, u kdew shaka sngi kaba dangmih na lyndet lum bad ong ia u, “Me ong ba ym don blei, te peit keiñ katai ka sngi kaba long ki dak ki shin jong ki kam ki kti jong U”. “Em me, ka tai ka sngi te ka shu long hi” u pynphai nia kylliang. ” Me ong, don ki ut kiba wan iaid nangne mynne mynmiet te me ïoh i ïaki, me tip kiwan na ei, ki leit sha ei bad ki don sha ei? ” U kylli kylla. “Em me ngam tip, tang ba nga ïoh i ki dienjat keiñ, peit kine. (u da kdew artad) “O, me ruh mem ïoh i ïa kita ki ut, hynrei me ngeit baki ïaid lynti nangne tang neki dienjat jong ki, ki dienjat jong ki dei kiba pynshisha ïaka jingdon jong ki. Kumta wat lada ngim ïoh-i ïa U Blei ruh ngi ngeit ba U don shiaha lyngba ki jingthaw jong u kiba don sawdong jong ngi.”
Jar, ym lah pynphai ktien shuh uta u bym ngeit blei, naduh kata hi ka khyllipmat u la pyrkhat jylliew bad ula sdang ban kylla kaba mut.
Ngi lah ruh ban tip ia u Blei lyngba ki jingduwai jong ngi. Haki bym ngeit, te ki jingduwai kim i donkam ne don jingmut shisha, hynrei lada ngi duwai naduh ka dohnud bad ka mynsiem te U Blei u lah ban sngew bad sngap iangi. Wat lada Um kren haki shkor jong ngi ruh Un kren haka dohnud jong ngi.
Ban ieit ia U.
Kumno ngin ieit ia Blei? Ym don kam ban batai jrong iakane. Lada ngi ieit ïaka no kano ka briew lane ia uno uno u briew ngin leh ïaka ei kaei kaba bha tam naka bynta jong ki. Kumta ngi ruh lada ngi ieit ia u Blei te ngi dei ban leh ïaka ba bha tam naka bynta jong u bad kata kaba bha tam ka long; Ban ym leh ïaki no kino ki kam sniew kam bymman kiba long pop bad ban leh ïaka ba bha.
Ban shakri ia U .
Kumno ngi lah ban ieit ia Blei ia U ba ngim lah ban ïoh i lymda ngi ieit ïaki para briew. “Ka jingshakri ïaki para briew kadei ka jing shakri ia U Blei”. Ong ka ktien sneng.
Lada ngi peit kat kum ka jingthoh haka kot ñiam ki Khristan ka Baible, la kren shai ba kawei naki jingbishar kaba U Blei Un bishar ia u briew haka sngi bishar khatduh kam dei eh ïaki jingleh bakla ne ki kam bymman jong u, hynrei haduh katno ba u lehbha leh sbun ïaki para briew. Kane ka mut, ïaki ba duk ba kyrduh kiba shem shitom shem jynjar kiba kutlad kut kut lynti lane kiba donkam jingiarap.
U ta u nongbishar un khot ïaki ta kiba lehbha ïaki parabriew bad un ong, “Alea phi baroh kiba ioh bynta bad i pa jong nga namarba haka por ba nga thngan nga sliang phi ai bam aidih ianga, haka por ba don ha byndi phi wan peit wan jngoh ïanga, haba nga pang nga shitom phi wan iarap ïanga, haba nga lyngkhuid phi wan pynkup jaiñ ïanga. Te kita ki langbrot kiba long ki ba lehbha kin ong Ia uta u nongbishar, “Ah, Trai mynno ngi ioh i ba Me thngan Me sliang ba ngi dup ban ai bam, ba Me don ha byndi ba ngi dup ban leit peit, ba Me pang Me shitom ba ngi dup ban iarap ba Me lyngkhuid ba ngi dup ban pynkup jaiñ. Te uta u nongbishar u ong, Hooid, phim shym la leh keiñ ha nga, hynrei ïaka ei kaba phi la leh haki wei naki para kiba rit tam ka long kumba phi leh ianga.
Nangta Un khot ïaki ta ki blang kiba don shaka liang ka diang, kiba long kiba khwan myntoi shimet, kiba bamsap ki bym don ka jingsngewlem sngew synei para briew bad ong ïaki, “Khie leit noh na nga phi ki riew bymman sha kata ka ding bymjulip, namar mynba nga thngan nga sliang phim shym ai bam ai dih ianga, haba nga pang nga shitom ohim wan peit wan iarap ianga, haba nga don ha byndi phim wan jngoh ianga bad haba nga lyngkhuid phim wan pynkup jaiñ ianga. Ki ta ki riew bymman ruh kin ong kumjuh hi, “Ah,Trai Ah Trai, mynno ngi ïoh i ba Me pang Me shitom ba ngi dup ban wan peit wan i, ba Me thngan Me sliang ba ngi dup ban wan ai bam ai dih, ba Me don ha byndi ba ngi dup ban wan peit wan jngoh bad ba Me lyngkhuid ba ngi dup ban pynkup Jaiñ? Un ong ïaki, “Ka ei kaba phim shym la leh ha i wei naki para kiba rit tam, ka long kumba phim shym la leh ianga”
Hangne la sngewthuh shai kdar ba ka jing shakri ia u Blei ka long ka jingshskri para briew. Sngew nguh sngew burom shi katdei eh ïaki to kiba la iarap ïaki para briew khamtam iakito kiba synniang snam, synniang khyllai, pynchna iing shna sem bad kiwei kiwei ki jing ai ne jingiarap barit ruh kumjuh. Hynrei ka long pat ka jingtim ïaka ri bad ka jaitbynriew naka jingleh jong kito ki khwan myntoi shimet kibym salía shuh ban tuh ban lute wat iaka bhah jong kiwei. Kiba long ruh kum ki thlen nguid lum nguid wah kiba pynjot ïaka mariang ka sawdong sawkun tang naka bynta ka jingmyntoi shimet jong ki.
Kala dei kapor ba ngin kyndit noh bad ban pynkylla ïaka rukom pyrkhat pyrdaiñ naka sniew shaka ba bha bad naka ba bha sha kaba bha tam. Bad bam im ka jingim kaba don jingmut don jingthmu kum ba U Nongthaw Nongpynlong U kwah U thrang ïangi.
Khublei Shibun!
