Khliehriat, Risaw, 25: Ka ophis jong ka District Sports Officer (DSO), East Jaiñtia Hills District ha ryngkat ka jingïatreilang bad ka ophis jong u Block Development Officer (BDO), Saipung C&RD Block, East Jaiñtia Hills District ha ka sngi Thohdieng ka la pynkut noh ïa ka Block Level Chief Minister’s Youth Engagement Programme (CM-YEP) 2025 kaba la pynlong ar sngi lynter ha madan shnong ha Latyrke kaba hap hapoh ka Saipung C&RD Block.
Kane ka prokram ka dei kum shibynta ban ai mynsiem ïa ki samla ba kin mih shakhmat ban ïashim bynta ha ki program bapher bapher ban kyntiew ïa ka mynsiem jong ka jingïatylli, ka jinglong ryntih ha kiei kiei bad ban kyntiew ïa ka jinglong nongïalam.
Haba kren ha ka prokram ha Latyrke, u Block Development Officer of Saipung C&RD Block, East Jaiñtia Hills District, Dr R. Pyrtuh u la pynshai ba ka sorkar jylla na ka por sha ka por ka trei khlem sangeh lyngba ki tnat treikam bapher bapher ban thaw ki lad ki lynti ïa ki khun samla hapoh ka jylla ban long ka jingmyntoi ïa ki, u la ong ba kane ka prokram ruh, ka Block Level Chief Minister’s Youth Engagement Programme (CM-YEP) ka long ban kyntiew ïa ka longbriew manbriew khamtam eh ban kyntiew ïa ki samla ha baroh ki liang namar ki samla ki dei ka lawei jong ka ri.
U Dr Pyrtuh u la bynrap shuh shuh ba kane ka rynsan ka long ban pynkhlaiñ ïa ki samla ba kin long kiba sngew skhem, ka long ruh ka lad ban pynpaw pyrthei ïa ki sap ba ki don bad ka jingthmu jong kane ka prokram ka long ruh ban pynlong ïa ki khun samla kiba ïar ka jingmut jingpyrkhat da kaba ïa shim bynta ha kino kino ki kam kiba don jingmut, u la ong ruh ba wat ka jingbynpyrngia kaba da ki jingshad, jingrwai tynrai ruh ka pyni shynna ïa ka jingriewspah ka lariti ha ka thaiñ kaba don ruh ka jingmut ha kaba kyntiew ïa ka jingïalong kawei.
Haba kren pat sha baroh kito kiba la wan ban ïa shimbynta ha kine ki prokram ba ar sngi, u BDO u la ai mynsiem bad pynshlur ïa ki samla ba ki dei ban long barabor kiba mih shakhmat ban ïa shimbynta ha ki prokram bapher bapher bad ban wan ban ïa shimbynta biang ruh ha kane ka prokram Chief Minister’s Youth Engagement Programme (CM-YEP) kaba yn pynlong man la u snem, namar kane ka dei kawei na ki rynsan ba ki samla ki lah ban pynpaw pyrthei ïa ki sap ki phong jong ki.
Ha kane ka Chief Minister’s Youth Engagement Programme (CM-YEP) ki don bun jait ki jingïakop kum ka One Act Play, Guitar Playing (Solo), Declamation, Quiz, ka ïa tan tyllai, ka jingshad tynrai, ka jingrwai tynrai,ka Science Mela, ka jingïakop thoh Poetry, ka jingïakop thoh jingïathuhkhana ne Story Writing.
Ha ka jingïakop Quiz, u samla Christopher Chyrmang u la ïoh ïa ka kyrdan ba nyngkong, Kyrkhulang Bareh ka ïoh ïa ka kyrdan ba ar, kine ki dei kiba la mihkhmat na ka Sein Raij Secondary School, Jalaphet, katba u Sakhaios Pasleiñ uba na shnong Pala u la ïoh ha ka kyrdan kaba lai.
Ha ka jingïakop tan tyllai, ka Seiñ Raij Secondary School, Jalaphet ka la wan ba nyngkong, ka Latyrke S.C ka la long ba ar bad ka Lumjingshai Secondary School, Tluh ka la wan ba lai.
Ha ka jingïakop thoh jingïathuhkhana, u Ram Chyrmang uba na Seiñ Raij Secondary School, Jalaphet u la long ba nyngkong, ka Enishwa Kympat na Lumjingshai Secondary School, Tluh ka la long ba ar bad u Bravewell Tangliang na shnong Mooriap u la long ba lai.
Ha ka jingïakop ai rong (Painting Competition), u Jerry Nampui uba na Saipung u la long ba nyngkong, ka Angela Nongtdu ka long ba ar bad u Wanda O Langstang uba na Syrleiñ Secondary School, Jalaphet u la long ba lai.
Ha ka Talent Show, u Lalungthlai Nampui ba shnong Saipung ka la ïoh ïa ka nam jingjop ha ka kyrdan ba nyngkong, u Donal Pohthmi na Lumjingshai Secondary School, Tluh u long ba ar bad ka Angela Nongtdu na Syrleiñ Secondary School, Jalaphet ka long ba lai.
Ha ka Declamation Competition, ka Disa Shyrmang na Seiñ Raij Secondary School, Jalaphet ka long ba nyngkong, ha ka Guitar (Solo) Competition, u Damutshwa Pasleiñ na Syrleiñ Secondary School, Jalaphet u rah ïa ka nam lah duh.
Ha ka jingïakop rwai tynrai, ka Seiñ Raij Secondary School, Jalaphet ka rah ïa ka nam lah duh, ha ka jingshad tynrai pat ka Lumjingshai Secondary School, Tluh ka rah ïa ka nam lah duh bad Seiñ Raij Secondary School, Jalaphet ka long ba ar.
Ha ka One Act Play Competition, ka Sein Raij Secondary School, Jalaphet ka ïoh ïa ka nam lah duh, ha ka Science Mela pat u Heiborme Chyrmang lem bad ka kynhun na Sein Raij Secondary School ki ïoh rah ïa ka trophy.
Ha kane ka prokram la ïa don ryngkat lang ruh ka District Sport Officer (DSO), East Jaiñtia Hills District, ka kong S. M Rapsang, u Waheh Shnong Latryke, u bah J. Sutnga,ki nonghikai, ki khynnah skul lem bad ki nongshong shnong jong ka thaiñ.
Ka ophis jong ka District Sports Officer East Jaiñtia Hills District kan nang ïai bteng ban pynlong ïa kaba kum kane ka prokram, ka CM-YEP sa ha shnong Lumshnong ha ka 28 tarik bad 29 tarik mynta u bnai risaw ha kaba ki samla kiba na ki shnong kiba hap hapoh ka Lumshnong C&RD Block kin wan ban ïa shim bynta.
