New Delhi, Risaw 24: Ka Rashtriya Ekta Diwas ban kynmaw burom ïa ka lyngkhuh sngikha jong u Iron Man jong ka India, u Sardar Vallabhbhai Patel, la ju rakhe man la u snem ha ka 31 tarik Risaw. Ka Rashtriya Ekta Diwas ka pyni ïa ka jingïatylli, ka burom bad ka jingïatylli jong ka ri India. Ka jingrakhe ïa ka Rashtriya Ekta Diwas mynta u snem ka long kaba kham kyrpang ban rakhe ïa ka lyngkhuh sngikha kaba 150 snem jong u Sardar Patel. Ki jingrakhe mynta u snem ki long kiba kyrpang ha kiba bun ki liang ki ban pynlong ïa kane ka jingrakhe kaba sah jingkynmaw.
Ka jingrakhe man la u snem ïa ka Rashtriya Ekta Diwas ka pynkynmaw ïa ki para ri ïa ka bynta ba kongsan ba u Sardar Patel u la leh ha kaba thaw ïa ka ri India kaba laitluid bad pynïatylli ïa 562 tylli ki hima, kaba buh ïa ka nongrim jong ka ri India kaba mynta. Namar ka jinglong nongïalam bad ka jingaiti kaba skhem jong u na ka bynta ka jingïatylli ka ri, la burom ïa u Sardar Patel kum u “Nongtei jong ka jingïatylli ka ri bad u Iron Man jong ka India.”
Ka Ekta Nagar kaba don hapdeng ki lum Satpura bad Vindhyachal, ka pyni ïa ka jingmut jong ka “Ka jingïatylli ha ka jingïar”, kaba pynïasnoh lang ïa ka jingitynnad jong ka mariang bad ka jingriewspah jong ka kolshor.
Ki jingrakhe ba kyrpang mynta u snem jong ka Rashtriya Ekta Diwas kin kynthup, ïa ka jingïaid parade bad ka tamasa kolshor ha Ekta Nagar, Narmada distrik, Gujarat. Ha kane ka Parade, ki Central Armed Police Force (CAPF) bad ki pulit jong ka jylla kin pyni ïa ki jingtbit, ka jinglong ryntih, bad ka jinglong shlur jong ki. Ha kane ka National Unity Day parade mynta u snem yn kynthup ïa ki kynhun shipai na ka Border Security Force (BSF), Central Reserve Police Force (CRPF), Central Industrial Security Force (CISF), Indo-Tibetan Border Police (ITBP) bad Sashstra Seema Bal (SSB) lem bad ki kynhun pulit na ki jylla jong ka Assam, Tripura, Odisha, Chhattisgarh, Madhya Pradesh, Maharashtra, Punjab, Jammu & Kashmir, Kerala, Andhra Pradesh bad ka NCC. Ha kane ka parade yn don ruh ki shipai ba shong kulai bad ki shipai shong ut, ki jingpyni da ki jaitksew jong ka ri bad ki rukom ïakhun bapher bapher.
Ha kane ka parade yn pyni ruh ïa ka jingïashim bynta jong ki heh pulit kynthei bad ki dkhot. Ïa ka jingpdiang burom ïa u Myntri Rangbah yn ïalam da kawei ka ophisar kynthei. Ki pulit kynthei jong ka CISF bad CRPF kin pyni ïa ka Martial Arts bad ki Unarmed Combat drill, ban pyni ïa ka bor bad ka jingshlur jong ki khun kynthei jong ka India.
Ha kane ka parade mynta u snem yn don ruh ïa ka kynhun ïaid march past kaba kynthup ïa ki jaitksew bapher bapher na India jong ki BSF, ka kynhun shong kulai jong ki pulit Gujarat, ka Motorcycle Daredevil Show jong ki pulit Assam bad ka kynhun shipai ba shong da ki ut bad ka kynhun ki nongtem ba shong da ki ut jong ki shipai BSF, ki ban long ki jingpynbyrngia ba kongsan. Nalor kata, ki jaitksew jong ka ri – ki ksew Rampur bad ki ksew Mudhol – kin pyni ïa ka jingtbit jong ki. Kine ki jaitksew ki la noh synniang shibun kum ki nongkyntiew ïa ka bor ha ka por ki jingkhynra jong ki, da kaba pynpaw pyrthei ïa ka jingngeit jong ka Aatmanirbhar Bharat. Dang shen, ha ka jingïakob All India Police Dog, ka ksew Mudhol “Riya” ka la ïoh ïa ka kyrdan ba nyngkong bad kan mihkhmat ïa ka kynhun ba pyndonkam ïa ki ksew ha kane ka parade mynta u snem.
Ki dkhot jong ka National Cadet Corps (NCC) bad ki kynhun tem jong ki skul kin pyniphuh iphieng shuh shuh ïa kane ka jingrakhe da ki jingrwai. Ki samla NCC kin pynsngew ïa ka khubor “Ka jingïatylli ka dei ka Bor” lyngba ka jinglong ryntih bad jingshitrhem jong ki. Ka air show jong ka kynhun Surya Kiran jong ka Indian Air Force kan pynphuh pynphieng shuh shuh ïa ka parade.
Ban pynksan ïa ka khubor jong ka jingïatylli ha ka jingïar, ki tableaux na ki jylla bad ki union territory bapher bapher ruh kin long shi bynta jong ka parade. Ha ka National Unity Day parade mynta u snem yn don 10 tylli ki tableaux na ka National Security Guard (NSG), NDRF, Gujarat, Jammu & Kashmir, Andaman & Nicobar Islands, Manipur, Maharashtra, Chhattisgarh, Uttarakhand bad Puducherry, kaba pyni ïa ka phang pdeng “Ka Jingïatyli ha ka Jingïar.”
Ban pynlong ïa kane ka parade mynta u snem kaba kham itynnad, ki brass band na ka BSF, CRPF, CISF, SSB, Delhi Police, Maharashtra, Madhya Pradesh, Gujarat, bad Jammu & Kashmir kin ïashim bynta. Mynta u snem, ha kane ka parade yn don san ngut ki nongjop khusnam Shaurya Chakra na ka CRPF bad 16 ngut ki nongjop takma jingshlur na ka BSF. Kine ki riewshlur ki la pyni ïa ka jingshlur ha ki kam ïaleh pyrshah ïa ki Naxal ha Jharkhand bad ha ki kam ïaleh pyrshah ïa ki lehnoh ha Jammu & Kashmir. Ki shipai BSF ki la pyni ïa ka jingshlur jong ki ha ka Operation Sindoor ha khappud sepngi.
Ha ryngkat bad ka parade, ka prokram kolshor ba la pynlong da ka Tnad Deiriti, Sorkar India, kan pyni ïa 900 ngut ki nongshad kiba pyni ïa ki jingshad classical jong ka India, kaba pynpaw ïa ka jingriewspah ka kolshor jong ngi bad ka jingïatylli jong ka ri.
Ki jingrakhe Rashtriya Ekta Diwas ki thmu ban pynpaw pyrthei ïa ka jingngeit jong ka jingïatylli ka ri, ka jingshongsuk shongsaiñ bad ka jingieid ri, ban pynshlur ïa ki nongshong shnong ban pdiang ïa kine ki jinglong ba kordor. La kyntu ïa baroh ki nongshong shnong ban ïashim bynta shitrhem bad ban long shi bynta jong kane ka jingrakhe kaba khraw.
Naduh ka 1 tarik haduh ka 15 tarik u Naiwieng, 2025, ka Ekta Nagar kan pynlong ïa ka Bharat Parv, ha kaba yn don ki prokram ba ïadei bad ka kolshor bad ka food festival na ki jylla bapher bapher. Ka tamasa kan kut ha ka 15 tarik u Naiwieng da ki prokram ba kyrpang ban rakhe ïa ka lyngkhuh sngi kha u Blei Birsa Munda, ban pynpaw ïa ka kolshor ba itynnad bad ka jingngeit kaba khlaiñ jong ki jaitbynriew riewlum jong ngi.
