Nongstoiñ, Risaw 23: Ka jingpynkha jong ka sorkar ïa ki lai tylli ki C&RD Block ha West Khasi Hills ha u snem 2023 ba kynthup ïa ka Rambrai , Rimuliang bad Shallang C&RD Block, ka la pynkmen shikatdei ïa ki paitbah jong ki shnong ki ba hap hapoh kitei ki block. Hynrei haduh mynta napdeng ki lai tylli ki Block ka sorkar ka la dep ban khot tender ban tei ïa ka Block ophis dei tang ka Rimuliang C&RD Block.
Katkum ka tender paper kaba No.CDME.184/2025/6 kaba la pynmih da ka Directorate of Community & Rural Development jong ka sorkar jylla, kaba la soi da u Shri Sibhi Chakravarrthy Sadhu kaba Dated Shillong The 15th October 2025, la kdew ba ki la mang pisa na ka bynta ban tei ïa ka main building ka long Rs.4,22,75,347.00 tyngka bad ka por ban pyndep ka long 18 bnai.
Kaba lyngngoh ka long ba ha katei ka tender paper ka sorkar ka khlem kdew kyrteng ïa ka shnong bad ka jaka ban tei ïa katei ka Block ophis. U nongthoh khubor haba ïoh lad ban ïakren bad u bah D.A Lyngdoh uwei na ki riew rangbah ka thaiñ Rimuliang u ba dei ruh u sordar jong ka shnong Nonglang, u la ong ba ka shnong Nonglang ka dei ka shnong kaba u Conrad Kongal Sangma Myntri Rangbah ka jylla ha u bnai Naiwieng 2023, u la wan dalade ban plie ïa u mawnongrim jong katei ka Block.
Nalorkata ïa ka ophis trei kam ba shi por jong ka Block ruh la dep ban buh, hynrei mynta pat ka jingbym jer kyrteng ïa ka shnong bad ka jaka ban tei ïa katei ka Block ophis, ka la pynartatien haduh katta katta ïa ki paitbah jong ki 62 tylli ki shnong kiba hap ha ka Rimuliang area.
U la ong ruh ba ha kine ki sngi ban wan, na ka liang ki riew rangbah ka thaiñ Rimuliang kin sa leit ban ïakynduh ïa u Conrad Kongal Sangma Myntri Ranbah ka ka jylla ban pan jingshai hangno yn tei ïa ka Rimuliang Block ophis.
Kumban pynkynmaw ba hadien ba u Conrad Kongal Sangma Myntri Rangbah ka jylla, u la wan ban plie ïa u maw nongrim jong ka Block ophis, ka Nonglang ka la ai sngewbha ïa kawei ka jaka kaba heh bad kaba itynnad bha, namar ka don harud ka surok bah ha kaba ki briew jong ka sorkar ki la dep ban thew ban woh.
Hynrei, kaba lyngngoh ka long ba hadien katto katne por la mih kawei ka kynhun kaba la pynlong ïa ka jingïalang ha ka shnong Tynghor, ban dawa ba ha kaba u bah Nasar Syiem Jahnoh Sirdar ka hima Jyrngam u la ïa don bynta lang bad katei ka kynhun.
La ong ba watla ka shnong Nonglang ka la dep ai ïa ka jaka ruh, ki dang don ki briew kiba kam ba la phah da ka sorkar kiba leit wad jaka ha ki thaiñ Tynghor. Hadien ba ki la leit ban wad jaka ki khubor hamsaïa ki la saphriang sted bha ba ïa ka Block ophis na ka shnong Nonglang yn pynkynriah noh sha Tynghor.
Dei halor katei ka nongrim ba ka jingbym kdew kyrteng jong ka sorkar ïa ka shnong bad ka jaka ban tei ïa katei ka Block ophis, ka la pynartatien ïa ki paitbah kat haduh ba ki la don ruh kiba kynnoh ba ka dei ka jingïasuh buit jong u bah K.P.Pangñiang MLA barim ka Rambrai Jyrngam.
Ki jingkynnoh ba bun jait ki la mih pyrshah ïa une u MLA barim, namar ba u dei u nongshong shnong jong ka Tynghor bad ka la pynkhihwin ruh ïa ki paitbah jong ki 62 tylli ki shnong, ha kaba ki la ong ba lada ka sorkar kam kam lah ban kdew shai bad pynthikna ba ïa ka Block ophis yn tei ha ka shnong Nonglang, kim banse ban pynlong da ki jingïakhih kiba tyngeh bad wat ban leit sha ka Ïingbishar ban dawa ïa ka hok.
