Ka jingtyrwa pyntreikam ïa ka ‘One Nation one Election’ ka lah ban ktah ïa ki ADC: EM Law

Shillong, Risaw 23: Ka Executive Member jong ka KHADC kaba bat ïa ka tnat Aiñ (Law) ka Kong Deity H Majaw ka la pynpaw ïa ka jingbym pat da donkam palat ban ïakren halor ka jingtyrwa jong ka Sorkar Pdeng ban pyntreikam ïa ka ‘One Nation one Election Policy ne ka Kawei ka Ri kawei ka Elekshon’.
Ïa kane ka la jubab ïa ka motion ba la wanrah da u MDC ka Laban Mawprem u Bah Ricky Shullai ha kaba u la pynpaw ïa ka jingtieng ba lada ka Sorkar Pdeng ka ïaid shakhmat ban pyntreikam ïa kane ka jingtyrwa ka lah ban ktah ïa ki jaka jong ka 6th Scheduled bad khamtam ïa ki Autonomous District Council, haba na ka liang ka EM ka la kubur ruh ba kane ka policy kan lah ban ktah ïa ki District Council.
Haba pynshai ïa kane ka EM ka la ïathuh ba ka Sorkar Pdeng ka la dep thaw ïa ka High Level Committee halor kane ka jingtyrwa bad hadien ba kane ka Committee ka la wanrah ïa ka kaiphod kaba la pynpaw ba bun na ki paidbah ki pdiang ïa kane ka policy naba kadei kaba wanrah ka jinglut kaba duna.
Ka la pyntip ba hadien ba la aiti ïa kane ka kaiphod ka sorkar pdeng ha u bnai Nailur 2024 ka la mynjur bad ha u Naiwieng 2024 pat ka sorkar ka la wanrah da ka Bill bad hadien ba la ïatai hapoh Ïingdorbar Thaw aiñ ka Ri kane ka Bill ka khlem poi shano shano bad ka Ïingdorbar Thaw aiñ ka ri ka la mynjur ban thaw noh da ka Joint Parliamentary Committee ha kaba kane ka Bill haduh mynta ka dangsah ha kane ka Committee.
Haba pdiang ïa ki jingai jingmut jong u MDC ka Laban Mawprem ba ka EC ka dei ban thoh lypa sha ka sorkar, sha u Chief Election Officer ban ïakren lypa halor kane ka kam, na ka liang ka EM ka la pynpaw ba kane ka One Nation one Election kan lah ban ktah ïa ka jingsynshar laitluid jong ki ADC, khamtam ha KHADC lada mynjur ïa kane ka Bill.
“Kumba long mynta ha ka amendment kaba 129 haba ïadei bad kane kam, ym pat don ka jingkdew ba ïa kane ka Bill yn pyntreikam lang ruh ha ki ADC, hynrei ngi hap pat ban shim ïa ki lad ki lynti ban ïada lypa, kumta hap ban thoh sha ka sorkar bad sha kiwei pat ki tnat kiba donkam halor kane ka jingtyrwa,” bynrap ka EM.