Nongpoh, Risaw 23: Ka St. Paul’s Higher Secondary School, Nongpoh mynta ka sngi kala pynlong ïa ka Annual Day-cum-Parents’ Day, kaba la long ka sngi kyrpang jong ka jingkynduh lang hapdeng ki kmie ki kpa, ki nonghikai, ki khynnah skul bad ki khynnah pule barim jong ka skul, ban ïasyllok, ïamir jingmut bad ban pynkhlaiñ shuh shuh ïa ka jingïadei hapdeng ka skul bad ki kmie ki kpa, khnang ban nang kyntiew ïa ka pule puthi bad ka roi ka par jong ki khynnah skul ha kane ka juk kaba bun ki jingsniew.
Ïa kane ka jingrakhe la pynlong ha phyllaw jong ka skul ha ka jingdonlang jong u Bah Mayral Born Syiem, MLA ka Nongpoh uba la long u kongsan, u Bah R. Shadap, DSEO Ri-Bhoi kum u symbud kongsan, bad u Fr. Peter Syiemlieh, Parish Priest ka Nongpoh Parish, lem bad ka Rev. Sr. Angelina Ch. Marak, Headmistress ka skul, ki nonghikai, ki kmie ki kpa bad ki khynnah skul.
Ha kane ka sngi, ki khynnah skul da ka jingkmen kila pyni da ki prokram bapher bapher kum ka shad kmen, ki skit bad kiwei kiwei ban pynpaw ïaki sap ki phong jong ki.
Haba kren ha katei ka sngi, u Bah Mayral Born Syiem u la pynpaw ka jingsngewkmen halor ka jinglah jong ka skul St. Paul’s ban bteng ïa ka jinglong ka skul ba don burom naduh ki por mynshuwa. U la ong ba ka skul ka la pynmih shibun ki samla pule kiba mynta kila long briew bad kyntiew ïa ka imlang sahlang lyngba ka jingpule bad ka jingnang jingstad jong ki.
U MLA u la kyntu ïa ki khynnah pule ba kin minot ha ka jingpule, kin long kiba don akor bad kiar na ki kam sniew kiba la saphriang ha kane ka juk. U la ong ruh “ban pynlut por than ha ka mobile khlem don jingmyntoi kam don jingmut, namar kumta ka pynjot ïa ka jingmut jingpyrkhat bad ïa ka por ba kordor jong phi.” U la pynkynmaw ïa ki khynnah ba ki dei ban sngewthuh ïa ka jingtrei shitom bad ka jinglen lade jong ki kmie ki kpa kiba jaw ummat ban pynbiang ïa ka jingdonkam jong ki khun.
Shuh shuh u la kyntu ruh ïa ki kmie ki kpa ba kin ai ka jingsneng jingkraw naduh ïing, namar kata ka dei ka nongrim kaba kongsan eh ha ka jinglong briew jong ki khun. U la ong, “Ka jinghikai naduh ïing ka long ka jingsneng kaba pynkhlaiñ ïa ka jinghikai kaba ïoh na skul” u la bynrap.
