Thrang ki Pnar bad Karbi ban ïa im suk da ka jingïasngewthuh jingmut

Jowai, Risaw 21: Hadien ka jingïasngewthuh jingmut lang hapdeng ki ar jaitbynriew kata ki Pnar na Lapangap bad ki Karbi na Tahpat, ha ka sngi Balang ki nongrep na ka shnong Lapangap West Jaiñtia Hills District kila sdang ban leit ot ïa u kba u khaw uba la ih na ki pynthor ha ryngkat ka jingïasynlang ki bor District, ki pulit na baroh arling bad ki kynhun sengbhalang bapher bapher na ka jylla.
Kane ka jingshah ban leit ot ïa u kba kala wan hadien ka jingkren ïasngewthuh jingmut bad ka jingïapynbeit naduh u Myntri Rangbah ka jylla Meghalaya bad u Chief Executive Member ka Karbi Anglong Autonomous Council (KAAC) ha ryngkat ki nongïalam shnong na baroh ar liang.
Hashaw ban leit ot ïa u kba mynta ka sngi kala don ka jingïalang bad ka jingïasoi hapdeng u Waheh Shnong ka Lapangap u ma Deimonmi Lyngdoh kumjuh na Tahpat u Olingson Timung, ha ryngkat ka jingdon lang ki bor District bad ki pulit.
Ha kane ka jingïasoi la dawa ban wat ïa ki briew kiba donkti ban shim ïa ka jingim uwei u briew jong ka Karbi ïa uba la tip kyrteng Orivel Timung, khnang ban ïaibeit ka jingleit ot ïa u kba ha kitei ki jaka rep khamtam ha ki por ban wan.
La ïakut ki nongshong shnong na baroh ar liang kim dei ban ïa tuklar ïa ki kam pud kam sam ha kitei ki jaka ïa kajia katba ka jingïakren pynbeit ka dang ïaid shakhmat hapdeng ki ar sorkar.
Dei ban shah ïaka jingthung dieng, ban sharai mrad bad ban rep ban riang sha kitei ki jaka khappud ha ryngkat ka jingïasngewthuh jingmut da kaba ïa pyntip lang na baroh ar liang.
Ka jingleit ot kba kala sdang naduh mynta ka sngi ha jingkat ka jingshong suk shongshngaiñ ha pdeng kine ar shnong kaba kila thrang bad la angnud bha ban wan biang ka jingïasngewthuh jingmut lang kumba long naduh ki por mynshwa.