Pynkup burom ka JEC Khliehriat ïa ki samla pule ba la pyndep ïa ka Graduade bad Master Degree

Khliehriat, Risaw 22 : Ha ka rukom kaba i shongkun bha, ka Jaiñtia Eastern College (JEC) Khliehriat mynta ka sngi ka la pynlong ïa ka prokram kaba kyrpang ha kaba la pynkupburom ïa ki samla pule jong ka college kiba la pyndep ïa ka jingpule ha ka kyrdan Graduate bad Master Degree ha ki subject pule bapher bapher, ha kane ka sngi u MLA Khliehriat, u bah Kyrmen Shylla u la long kum u kongsan bad u Unit Head Dalmia Cement Bharat Limited, Meghalaya Unit, u Padmanav Chakravarty, kum u symbud kongsan.
Sngewtynnad ruh ban tip ba ka Jaiñtia Eastern College Khliehriat hapoh ka jinglam khmat u Principal, u Dr Phervision Nongtdu, mynta ïa ka college la ithuh ne Affiliated ruh da ka skul bah North Eastern Hills Univirsity (NEHU) bad Accredited da ka National Assessment and Accreditation Council (NAAC).
Na ka liang u Dr. Phervision Nongtdu u la pynsngew ïa ka khana lyngkot ha kaba iadei bad ka jingpass ki khynnah bad ong ba na ka bynta u snem 2023 haduh 2025 na ka bynta ka course kaba lai snem ki la don haduh 29 ngut ki khynnah kiba pule ïa ka Arts bad ka jing pass ki khynnah ka la kynjoh haduh 95 percent, na ka bynta ki khynnah ba pule ha ka Commerce ki khynnah pule ki don 7 ngut bad baroh ki pass, ki la don 18 ngut ki khynnah kiba iakhun ïa ka MA ha ka Khasi bad baroh ki pass, ha ka Education ki don 12 ngut, ha ka PG-University ki don lai ngut ki khynnah ba ba ioh Top Ten ha ka MA Khasi, ha ka Education ruh ki don ar ngut kiba rung ha ka Top Ten, Sociology ki don 8 ngut bad baroh ki Pass, History ki don 2 ngut, English 11 ngut, Economis ki don 5 ngut baroh ki pass
La ong ba ki don ruh haduh 30 ngut ki khynnah kiba pyndep ïa ka jingshah hikai bad jingpule ha ka Beauty Care Course na ka college bad ïa kine ruh la pynkup burom ha kane ka sngi, halor kane u Dr P.Nongtdu u la ai khublei ïa ka CSR jong ka company Dalmia kaba la ai ka jingkyrshan kaba pura lyngba ka DIKSHA Course kaba dei ka Beauty Care Course bad kyrpad ïa ka Dalmia ba kan nang ïai kyrshah shuh shuh na ka bynta kane ka Beauty Course ka ban long ka jingmyntoi ki samla kiba don sap ha ka kam pynbha briew ne Beauty Care.
La pynsngew ruh ba shen kan sa don ruh kawei ka shnat pule, ka Prime Start up kaba dei ka skim kaba na ka sorkar ha ka ba la sdang ïa kane ha kaba iadei bad ka kam jngikai pyrthei ne tourism ha kaba la ai jinghikai kumno ban long ki Guide bad kiwei kiwei ki jait jinghikai.
Haba kren kum u kongsan, u bah Kyrmen Shylla, u la ai ka jingkitbok kitrwiang bad ai jingiaroh ïa baroh ki samla pule kiba la shah pynkupburom ha kane ka sngi bad ong ba kam dei kaba suk ban poi sha ka thong, u ai ka jingiaroh ïa ka jingtreishitom ki samla pule kiba shah pynkupbutom bad ong ba kane ka riam gown kaba ki phong mynta ka sngi ka pynphalang ïa ki hi ba ki sngewthuh shai mynta ba ki la poi sha ka kyrdan graduate da kaba iaid lyngba bun ki jingeh, ki jingialeh ha ka lynti iaid jong ki, u la ai khublei ruh ïa u Dr P. Nongtdu uba dei u Principal jong ka college.
Haba kren pat halor ka Beauty Care Course kaba don ha Jaiñtia Eastern College Khliehriat, u kongsan u la ong ba ki bun ki karkhana dewbilat kiba don ha East Jaiñtia Hills District kiba la pyntreikam ïa ki skim jong ka CSR ha ki bynta jong ki shnong bapher bapher hynrei kumba ngi tip ba ka East Jaiñtia Hills District ka dei ka district kaba shah ktah bha kumta ka u la ong ba ka deihok ban ioh bun ki bha jingmyntoi kum na ki skim kiba na ka CSR kumjuh ruh na ka DMF, kumta ha kane ka sngi u ai ka jingiaroh ïa ka Bharat Dalmia Cement Ltd kaba la kloi ban noh syniang bad kaba la shim ïa ka synjam ha kaba kyrshan ïa kane ka jingpule DIKSHA Beauty Care Course ka ban iarap shibun ïa ki samla ka district.
U heh jong ka Dalmia Cement Ltd, u Padmanav Chakravarty u la pynpaw ka jingsngew kmen halor ka jing pass bha ki khynnah pule jong ka Jaiñtia Eastrn College Khliehriat kiba la ioh ruh ïa ki marks kiba heh, u ai ka jingkitbok kitrwiang ba kin ioh ïa ka lawei kaba phyrnai ban kyntiew shuh shuh ïa k district sha ki kyrdan kiba shalor.
Utei u symbud kongsan u la ong ba ka company Dalmia ka la leh bun ki kam pynroi ban kyntiew ïa ka thaiñ bad ka company ka la pyrshang ruh ban pynlong ki prokram ai jinghikai ha ki jait kam bapher bapher ban kyntiew ruh ïa ka ioh ka kot jong ki briew ka thaiñ bad ong ba ka kam kaba dawa bun bha ka dei kane ka beauty care, u pynpaw ka jingsngew kmen ruh ba ki samla pule jong ka college ki la leh bha ha ka jingpule bad jingshah hikai ha kaba ïadei bad ka Beauty Care Course kaba la ai jingkyrshan da ka Bharat Dalmia Cement Ltd.
Ha kane ka prokram la don lang ruh u Rev. F.S Rymbai, kum u shongknor, uba bat ruh kum u President, Governing Body, Jaiñtia Eastern College Khliehriat, u MLA barim jong ka Khliehriat uba dei ruh u Waheh Shnong Khliehriat West, u bah Justine Dkhar, u Deputy Manager, CSR Lead, Dalmia Bharat Foundation, Thangskai, u Jitumoni Kalita, u Head HR, Dalmia Cement Bharat Limited, u Vinay Kumar Mishra, u dkhot jong ka College Governing Body, u bah Livingstone Phawa, ki samla pule jong ka college, ki Profesor bad kiwei kiwei ki riew rangbah.
Shuh shuh ha kane hi ka sngi u kongsan, u bah Kyrmen Shylla u la pyllait paidbah ïa kawei ka kot ‘Implementation of NEP 2020 in Higher Education- A Case of Jaiñtia Hills’ ba la thoh bad pynbit pynbiang da u Dr Phervision Nongtdu bad ka Prof. Ibakordor Tiewsoh.
Ïa ka prokram la pynkut da kaba rwai lang ia ka jingrwai Indian National Anthem.