Shillong, Risaw 20: Ka Meghalaya Football Association kan pynkup burom ïa ka Alisha Lyngdoh bad ka Bonifilia Shullai ha ka por shongthait shiteng jong ka jingïalehkai ka lympung Women’s Tri-Nations Tournament hapdeng ka India bad ka Iran, ka ban long ha kane ka sngi Ba-ar ha JN Stadium, Polo.
Kine ki ar ngut ki thei ïalehkai phutbol ka jylla Meghalaya ki la don bynta bad ka kynhun ïalehkai U17 jong ka ri kaba la thaw histori dang shen da kaba ïohrung sha ka AFC U-17 Women’s Asian Cup China 2026. Ka kynhun ïalehkai jong ka ri India ka la rung khatduh ha ka AFC U-17 Women’s Asian Cup dei ha u snem 2005.
Ka Alisha bad ka Bonifilia ki la wanphai biang sha Meghalaya na ka bynta ka por shongthait kaba lyngkot shuwa ba kin sdang ïa ka jingpynkhreh na ka bynta ka Indian Women’s League bad ka kamram ha ki jingïalehkai bar ri.
