Jowai, Risaw 20: Shi bynta ban ïakhun na ka jingpyndonkam ïa u Drug ka NPP Primary Unit Panaliar kala pynlong da ka jingïalehkai Football kaba la tip kum ka Super 7 Knock-out Football Tournament halor ka phang kaba ong “To rise above the influence, choose life not substance abuse”.
Ïa kane ka lympung la pynlong ha madan bol Panaliar ha kane ka sngi sdang jong ka 18 tarik u Risaw u ma Eddistone Shylla ula long kum u kongsan, katba u ma Wanna Lyngdoh kum u Symbood kongsan, ïa ka jingïalang la pynïaid da u Lonely Phira, u Vice President ka NPP Panaliar.
La pyntip ka kynhun kaba ïoh rah ïa ka nam lahduh kan ïoh rong da ka pisa kaba Rs. 40,000, katba ka kynhun kaba wan ba ar kan ïoh Rs. 20,000 baroh ka khusnam ka long Rs. 60,000 hajar tyngkat.
Naka ling u kongsan ma Eddiestone Shylla haba ai jingkren ula kyntu ïa ki nongïalehkai ba kin pyndonkam hok ïala ka sap ka phong kaba ki don hapoh ka madan ïalehkai, da kaba kyntu ruh ban kin don ka mynsiem ïalehkai.
Shuh shuh ula ai mynsiem ïa ka Unit NPP Panaliar bad ïa kiwei de ba kin pynlong ïa kum kine ki lympung ïalehkai hapoh ki shnong ki thaw jong ki.
Katba ïa ki kyntien ai khublei la ïoh na u Heipor Syngkon uba long u Secretary ka NPP Youth Wing Panaliar.
Haba phai sha ka jingïalehkai ha katei ka sngi ka Panaliar kala jop da 4-3 kol ïaka Lumsuwe.
