Shillong, Risaw 17 : U Myntri ka tnad Development of North Eastern Region (DoNER) u Jyotiraditya M Scindia ula pynbna ba ka Sorkar kan kyntiew kyrdan ïa ki phra tylli ki jaka shangkai ba khring bha ka Thaiñ Shatei Lam Mihngi kynthup ïa ka Sohra , kum kiwei na ki jaka wankai kiba biang duh ha ka pyrthei ne sha ka kyrdan world-class.
Kine ki jaka ki kynthup ia ka Kaziranga, Ziro, Sohra, Thenzawl, Matabari, Kisama, Namchi, bad Moirang bad yn pynroi ïa ki lyngba ka Public-Private Partnership (PPP).
“Ki Homestay bad ki eco-tourism models kila nang poi sha ki Jylla bapher bapher, kaba synñiang haduh 45% ka jingkiew ha ka ïoh ka kot ha ki jaka nongkyndong bad pynïoh ïa ka kamai jakpoh kaba neh shirta” ong u Scindia ha New Delhi haba kren sha ki lad pathai khubor ha ka sngi Thohdieng.
U Myntri ula pynpaw ïa ki jingpyrshang jong ka DoNER ban buh ïa ka thaiñ Shatei Lam Mihngi ha ka map ki kam jngohkai ka pyrthei lyngba ka Unified Brand Northeast Strategy. “Man ki Jylla kila dep ithuh ïa la ki jingdon jingem ba kyrpang bad ki jingshem-kum ki ksai muga na Assam, shynrai Lakadong na Meghalaya, Polo na Manipur, jingrep ba khlem dawai na Sikkim bad u Sohtrun na Tripura-ban kyntiew ïala ka jong ka jingithuh” ula ong.
“Ula iathuh ba baroh ki Jylla Shatei Lam Mihngi kin sa ïoh lynti rel noh hapoh u 2029” ong u Scindia haba bynrap ba ki kam ki dang ïaid shaid shaid haba ïadei bad ka Kaladan bad ka India-Myanmar-Thailand Highway Project, ka ban plie ïa ka jingkhang jong ka kha\ïi ka pateng bad kiwei ki Ri.
Ula ong ba ka thaiñ Shatei Lam Mihngi kala nang paw kum ka engine ba roi ka par ba thymmai jong ka Ri India, da ka jing kynshew pisa ba kot haduh T.4.48 lak klur ha kine ki snem bala leit.
U Scindia ula ong ba ka thaiñ kala ïaid ha ka lynti ka jingkylla kaba khraw hapoh ka jinglong nongïalam u Myntri Rangbah Duh Narendra Modi.
