La plie ïa ka ophis thymmai ka Jowai Civil Defence & Home Guards, kaba 9 klur tam

Jowai, Risaw, 17: U Myntri ka tnad Civil Defence & Home Guards jong ka sorkar jylla u Brening A. Sangma mynta ka sngi Thohdieng 17 tarik u Risaw ula wan ban plie ïa ka ophis thymmai jong ka Jowai Civil Defence & Home Guards kaba don ha Hali Synna, Mihmyntdu, Jowai West Jaiñtia Hills District.
Ïa kane ka ophis thymmai la tei ha ka jinglut kaba 9 klur tam eiei bad mynta kane ka tnad ka la ïoh la ka jong ka ophis treikam kaba pura ha Mihmyntdu, ïa kaba la pynkynriah jaka noh na kawei ka ïing shongwai ha Dong Mihsngi, Ladthalaboh, Jowai.
Haba ai jingkren kum u kongsan u Brening A. Sangma ula pynsngew lyngba ka tnad Civil Defence & Home Guards ka jylla la ïoh ban ai jinghikai da ki hajar ngut ki nongtrei mon sngewbha ha ki bynta bapher bapher naduh ka rukom ai jingïarap ba nyngkong eh, ban pyllait im ïa ki briew na ki jingjia ba sngewsih bad kiwei kiwei de.
Ula ong ba ka sorkar kan pylleit jingmut bad pynkhlaiñ shuh shuh ïa ka rukom treikam jong kane ka tnad Civil Defence & Home Guards kata ban ai jingshakri da kaba bha tam sha ki paidbah, da kaba pynsngew ruh kane ka tnad ka la dep ban pynrung kam na ka bynta 445 tylli ki kam bapher bapher ha ka Rozgar Mela kaba la long haka 20 tarik Nailar 2025 bad la sam ruh ïa ki shithi thung kam sha baroh.
Ula ïathuh ruh ba ka sorkar ka la mynjur ïa ki 708 tylli ki kam ban thung pura (permanent post) ha ka Border Wing Home Guards Battalion na ka bynta ki ar tylli ki Battalions jong ka State Disaster Response Force (SDRF) ki ban trei hakhmat eh ban ai jingïarap ha ka por ba donkam.
Na ka liang u ma Wailadmiki Shylla, u myntri ka tnat ka koit ka khiah uba la long ruh kum u symbud kongsan ula pynsngew ïa ka bynta ba kongsan naduh ka jingpynbha ïa u surok ban poi sha kane ka ophis thymmai, da kaba u kyntu jur ïa kane ka tnad ba kan pynlong ïa ki prokram ai jinghikai hapoh Jaiñtia Hills bad sha kiwei de ki District jong ka Jylla.
Kham mynshwa jong ka jingïalang la ïoh ban khap ïa u ribbon da u kongsan haka jingdon lang u M.K. Sangma, u Director ka Civil Defence jong ka jylla, u R. P. Khongwar, Joint Commandant General of Home Guards ka Jylla, u SP ka West Jaiñtia Hills u Jagpal Singh Dhanoa, IPS, ki nongtrei ka Jowai Civil Defence & Home Guards, ki ophisar na ka tnad PWD nalor kiwei kiwei de.
La pynphuh shuh shuh ïa kane ka sngi da ka put ka tem da ki Brass Band jong ka Border Wing, Home Guards Battalion bad ka Pipe Band jong ka Central Training Institute ka Civil Defence and Home Guards, Meghalaya, Shillong.