Nalor ba la kular ban siew dang bteng ïakhih ki FASTCOM don ei ei ha lyndet : Dy CM

Shillong, Naitung 1 : U Symbud Myntri Rangbah ka jylla u bah Prestone Tynsong ula ther da kaba tyngeh mynta ka sngi ïa ki nonghikai hapoh ka lama Federation of All School Teachers of School Teachers of Meghalaya (FASTOM) da kaba u la ong ba nalor ba u la khot ïakren bad kular hakhmat jongki ba ka sorkar kan kyntiew beit ïa ka Grant in Aid na ka bynta ban pynkiew tulop ïa ki bad pynthikna ruh ban leh bad mynjur ha ka jingïakynduh shen jongka Kynhun Myntri hynrei ki dang bteng beit ban ïakhih bad kane ka pynpaw ba don kaei re kaei sha lyndet lym kumta balei kim pdiang ban leit phai noh sha la ki ïing ki sem bad lada jia ba ka sorkar kam pyntreikam ïa ki jingkular ki lah ban ïakhih tyngeh ha kata ka por.
“ Kum uwei na ki nongïalam ha ka sorkar mynta ka sngi nga la khot ïakren ïa ki ha kaba la ïadon lang ruh u Addl. Chief Secretary uba dei peit ïa ka tnad Pule Puthi ha ka jylla bad ha kane ka jingïakren nga la kular rangbah ïa ki kum u nongïalam bad wat u Myntri Rangbah ruh ula dep kular ïa ki nonghikai ha ri lum Garo ba ka sorkar kan pynthikna ban pyntreikam beit ïa ki jingdawa kata ban kyntiew ïa ka Grant khnang ba ki Managing Committee kin pynheh tulop ïa ki. Nga la ong ïa ki ba kin sangeh noh ban ïakhih bad leit phai noh sha la ïing lasem. Hynrei haba ki dang bteng ban ïakhih kane ka pynpaw ba ka don sa kaei re kaei kaba sha lyndet bad kam mut tang ïa ka jingdawa pynkiew tulop namar ki la dei ban hun haba la kular da ngi ki nongïalam jongka sorkar. Ai ba ki paid nongshong shnong ka jylla kan bishar ïa ki halor kane ka jingïai bteng jongki ban ïakhih” ong u Symbud Myntri Rangbah.
U bah Prestone u la khot ïakren ïa ki nongïalam ka FASTOM bad kular ban pyntreikam ïa ki jingdawa jongki kata ban kyntiew ia ka Grant bad kumjuh ruh ban kyntiew ïa ka tulop jongki sha ka 18,000 bad ban kyntiew pat 5% man la u snem. Hynrei haba ki nongïalam ka FASTOM ki lum ïa ka ka jingïalang hadien ba la wan ïakren, ki nonghikai ki la rai ban bteng beit ïa ka jingshong kyllaiñ myngngor hajan Addl. Secretariat katba kim pat ïoh da ka jingthoh ne katba ym pat ai jingmynjur da ka Kynhun Myntri.
Haba jubab ïa ki jingkylli, u bah Prestone u la ong “ Ka shong ha ki hynrei ngan ong ïa phi don aiu re aiu sha lyndet ba ki dang kwah ban bteng ïa ki jingïakhih namar ba ngi la dep kular ban ai beit ïa ka jingdawa jongki ha ka jingïakynduh jongka Kynhun Myntri”.
Haba la kylli hato phi tharai don ki seng saiñpyrthei kiba pynshit ïa ki na sha lyndet, u bah Pretone u la ong “ ïa kata phi lah ban kylli na ki balei kim hun haba nga la dep kular ïa ki kum uwei na ki nongïalam jongka sorkar”. U la ïathuh ba u la dep kyrpad ïa ki ban sangeh noh ïa ki jingiakhih bad lada jia ba ka sorkar kam leh ei ei ha ka jingïakynduh ka Kynhun Myntri ki lah ban sdang biang ban ïakhih da kaba tyngeh ruh.
U la ïathuh kine ki skul ba ïoh Grant in Aid ki dei kiba pynïaid da ki riew shimet, ki Balang, ki Shnong, ki Seng ne kynhun bapher bapher bad ka sorkar kam don bynta hynrei ka shu ïarap ai Grant ïa ki. Ban thung kam nonghikai ruh ka thung hi ka Managing Committee tangba ki shu hap bud ïa ki kyndon ba la buh da ka sorkar kumta wat ki Managing Committee jongki skul ruh ki don ka bynta kaba khraw bad ka jingkitkhlieh ban thaw lad kumno ban kyntiew ïa ka tulop ki nonghikai.