Dawa ban pynkiew noh ïa ka jingsiew tulop 5 bnai im khlem tulop ki nonghikai skul SSA, byrgnem sa ka MSSASA ban mih surok

Shillong, Naitung, 01: Ki nonghikai skul SSA kiba don hapoh ka shatri jong ka Meghalaya SSA School Association (MSSASA) ka la byrngem ban pynlong da ka jingïakhih sha surok lada ka Sorkar Jylla ka la dang pynslem ban pyllait ïa ka song pisa kaba T. 44.36 klur na ka Pla Tyngka jong ka Sorkar ban siew ïa ka tulop jong u bnai Rymphang bad Lber, 2022.
Kumba ka long mynta, ki nonghikai skul SSA ki la im khlem tulop naduh u bnai Rymphang haduh u bnai Jylliew na ka daw ba ka tnat Pla Tyngka jong ka Sorkar Jylla kam pat shym la pyllait ïa ka pisa kaba dang sah na ka song kaba T.104.36 klur kaba dei ka Balance Amount ba ka Sorkar Jylla ka hap ban bei na lade ban siew tulop sha ki nonghikai SSA katkum ka Capping Norms jong ka SSA.
U President ka MSSASA u Bah Aristotle Rymbai ha u kyrwoh ba la phah sha ki lad pathai khubor u la ong, “san bnai kynthih ki nonghikai skul SSA ki la leit sha skul ban hikai khlem ka tulop.
“Na ka ka bynta ka Financial Year 2021-2022 ka tulop ka dang sah mynta jong u bnai Rymphang bad u Lber. Na ka bynta ka Financial Year 2022-2023 ka tulop ka dang sah jong u bnai Ïaiong, Jymmang bad Jylliew,” u la ong.
U la ïathuh ba ka MSSASA ka la aiti da ka jingthoh sha ka Sorkar bad ong ruh ba la ïa kynduh ïa ki Ophisar ka tnat Pule Puthi ban pyllait noh ïa ka song pisa na ka T. 104.36 klur kaba dei ka Balance Amount ba ka Sorkar ka hap ban bei na lade ban siew tulop sha ki nonghikai SSA katkum ka Capping Norms jong ka SSA.
Kum ban shu pyntip, ha ka 2 tarik, Lber mynta u snem hadien ba ki nonghikai skul SSA ki la mih sha surok u Myntri ka tnat Pule Puthi u Bah Lahkmen Rymbui u la kular ba ka tnat Pla Tyngka kan sa siew ïa ka tulop 50% na ka song T. 104.36 klur bad hadien pat yn sa pyllait sa 50%.
Ha ka 20tarik, Lber, 2022 ka tnat Pla Tyngka bad ka tnat Pule Puthi ka la pyllait ïa ka song pisa kaba T. 60 klur na ka song T. 104.36 klur ban siew ïa ka tulop jong ki nonghikai SSA. Ha ka taiew ba khatduh jong u Lber, ka Sorkar India ka la pyllait ïa ka Second Installment kaba T. 44 klur sha ka Sorkar Meghalaya ban siew tulop.
“Kane ka song pisa na ka Sorkar Pdeng bad na ka Sorkar Jylla kam pat biang ban siew ïa ka tulop bad kaba sah mynta ka long sa ka jong u bnai Rymphang bad Lber, 2022. Ha kaba ïadei bad kane da ka jingsngewkhia ngi la ai da ka jingthoh ha ka Sorkar ha ka 12 tarik, Jymmang, 2022 ha u Myntri ka tnat Pule Puthi bad ngi la kyrpad ban phah ïa ka jingtyrwa sha ka tnat Pla Tyngka ban pyllait ïa ka song pisa kaba dang sah sa T.104.36 klur,” ong u Bah Rymbai.
Ha kaba ïadei bad kane, u Bah Rymbai u la ïathuh ba ka Seng ka la buddien na u Secretary ka tnat Pule Puthi ka Sorkar Jylla u Ambrose Ch. Marak, na u Myntri Rangbah ka Jylla u Conrad Kongkal Sangma bad na ka Sorkar India.
Ha kajuh ka por, une u nongïalam ka MSSASA u la pynkynmaw ïa ka Sorkar Meghalaya ka ban pynkiew noh ïa ka jingsiew tulop jong ki 12,541 ngut ki nonghikai SSA.
Ka Sorkar Jylla ka la pynkiew ïa ki nonghikai SSA ha u snem 2016 bad haduh mynta ka tulop ka sah kumjuh.
“Ngi la buh da ka jingthoh ha u Myntri ka tnat Pule Puthi u Bah Lahkmen Rymbui bad ngi la kyrpad ïa ka Sorkar ban pynkiew ïa ka tulop,” u la ong.
Katkum ka jingong jong une u nongïalam ka MSSASA, ha ka 27 tarik, Jymmang ka seng ka la ïohlad ban ïakren bad u Myntri Rangbah ka Jylla ha kaba u la ong ba kin long kiba ïai shah namarba ka Sorkar ka dang bishar.
“Naduh u snem 2020 ngi la ïaishah bad ngi la ïatreilang bad ka Sorkar ban kyntiew ïa ka tulop. Ha ka General Executive Council (GEC) ba la long ha ka 25 tarik Jylliew ngi la rai ban ai por hapoh 15 tarik Naitung, 2022 ba ka Sorkar kan ai ïa ka rai halor ka jingkyntiew ïa ka tulop jong ngi ki nonghikai SSA. Lada ka Sorkar kam lah ban shim rai ngim banse ban pynbna da ki jingïakhih,” la ong une u nongïalam ka MSSASA.