Jah rngai ka projek jngohkai Tasek Lake, watla ym pat dep ka kam, ka pisa la sei lut, kynnoh u Mingran

Shillong, Risaw 14: Kawei ka projek ki kam jngohkai pyrthei kaba dei ban don na Tasek Lake kaba ha East Garo Hills district ka la shu jah rngai watla ha ki kot ki sla la pyni ba la dep ban pyndep ïa ka kam bad wat ïa ka pisa ruh la dep ban sei lut baroh kaba la mang.
Ïa kane la pynpaw da u Mingran T. Sangma, u nongtrei monsngewbha uba na ka shnong u la ïathuh ba ka ‘Cottage and Wooden Bridge’ project kaba la mang na ka bynta ban tei ha ka jinglut kaba long T. 32 lak. Hynrei ym shym la ïohi satia shano shano ïa kane ka project.
Katkum ka jingïathuh jong u Sangma, ka ophis District Tourism kaba ha Williamnagar kam don jingtip ne don ki jingthoh (record) halor kane ka project. U la kynnoh ba ka ophis ka la kam ba bun na ki projek jngohkai ha ka district la pyntreikam beit beit da ka Meghalaya Tourism Development Corporation (MTDC), bad kane ka ophis kaba ha District barabor ka la shah ieh ne shah leh bym suitñiew haba ïadei bad kum kine ki project. La ïathuh ruh ba ka ophis kam don satia ïa ki kopi jong ki kot ba la khot tender, nangta ki jingtip ba bniah halor ka project, ka kyrteng ki contractor, ne ki status report halor ka jingïaid shaphrang ka kam ne ka jingpyndep pura ïa kum kine ki kam.
U Sangma u la ong ba kham hadien u la leit ban wad jingtip ruh lyngba ka RTI application napoh ka Directorate of Tourism ha Shillong hynrei u la lap ba la kdew bad pyni ba kane ka project la dep ban ai dak ba la pyndep pura ïa ka kam bad baroh ka pisa kaba la mang la dep ruh ban sei lut.
“Ha ka jingleit jurip bad jngoh hi dalade ïa ka jaka ba la buh ban pyndep ïa kane ka project, khlem lap satia ïa kano kano ka jingkieng dieng ne ka jingtei ïa ka ïing (cottage structure) kaba la shem. Na ka liang ki nongshong shnong ki la dep ruh ban pynthikna bad pynskhem ba ym shym la don satia kum kane ka project kaba la pyntrei hapoh ka Tasek Lake,” ong u Sangma.
U la bynrap ba ka jingkieng da ki seij ka la don ha kane ka jaka hynrei ka dei pat kaba la tei bad shna da ki seng shnong kiba pynïaid bad pynlong ïa ki jingïakob khwai dohkha bad ïa kane ki la tei ha u snem 2012 ne kham hashwa.
U Sangma u la pan ka jingpynshai bad ka rukom treikam kaba shai na ka MTDC bad ka directorate hapoh ki 10 sngi ha shwa ba un leit ban kiew ïinglieh ïingsaw hakhmat jong ka Ïingbishar.
“Kane ka kam ka la wanrah ka jingkylli kaba khraw bha halor ka jingtreikam kaba khuid kaba shit ba shai, ka rukom pynïaid ïa ka kam, bad ka jingpyndonkam bakla ïa ka pisa u paidbah kiba la mang hapoh ki projek tourism ha ka thaiñ Garo Hills bad u la dawa ïa ka jingtohkit kaba kyrkieh bad ki jingpynbeit na ki bor ba dei khmih ïa kane ka projek,” u la ong.